ज्या डॅमवर तो भेटायचा तिथेच स्वत:ला संपवायला गेली, अमरावती सेक्स स्कँडल प्रकरणी खळबळजनक अपडेट समोर
अमरावतीमधील परतवाडा येथील सेक्स स्कँडल प्रकरणी मोठी अपडेट समोर आली आहे. लैंगिक शोषण झालेली एक तरुणी स्वत:ला संपवण्यासाठी डॅमवर पोहोचली होती.
सध्या राज्यातील अनेक ठिकाणी महिला सुरक्षेचा प्रश्न उपस्थित होत आहे. अमरावती जिल्हातील सेक्स स्कँडल समोर येताच अनेकांच्या पायाखालची जमीनच सरकली आहे. आरोपीने अनेक महिलांवर लैंगिक शोषण करुन त्यांचे व्हिडीओ रेकॉर्ड केले. नंतर त्याने ते व्हिडीओ व्हायरल करण्याची धमकी देखील दिली. आता अमरवतीमधील परतवाडा जवळील वझ्झर डॅमवर एक तरुणी आत्महत्या करण्याच्या उद्देशाने पोहोचली होती. घटनास्थळी पोलीस आणि महसूल विभागाचे अधिकारी तातडीने दाखल झाले. तरुणीला वेळीच वाचवण्यात यश आले असले तरी, या घटनेने अमरावती सेक्स स्कँडल प्रकरणात धक्कादायक वळण आले आहे.
नेमकं काय घडलं?
पोलिसांनी तपास सुरू केला असून, तरुणीने आत्महत्येचा प्रयत्न का केला, याची चौकशी केली जात आहे. विशेष म्हणजे, या तरुणीचा परतवाडातील ‘अयान प्रकरणा’शी काही संबंध आहे का, याचीही पोलिसांकडून सखोल तपासणी केली जाणार आहे. कारण आरोपी अयान हा मुलींना भेटण्यासाठी वारंवार याच वझ्झर डॅमवर घेऊन जात होता, अशी माहिती समोर आली आहे.
दुसऱ्या आरोपीविरोधात देखील तक्रार
दुसरीकडे, याच अमरावती परतवाडा येथील तरुणींच्या लैंगिक शोषण आणि व्हिडीओ व्हायरल प्रकरणातील दुसरा आरोपी हुजेर खान (उर्फ उजेर खान) याच्यावर आता दुसरा गुन्हा दाखल झाला आहे. एका पीडित तरुणीच्या आईने पोलिसांत तक्रार दाखल करून हा गुन्हा नोंदवला आहे. पीडित तरुणीच्या आई-वडिलांनी आरोपीला समजून सांगितल्यानंतरही हुजेर खान त्या तरुणीला वारंवार फोन करून त्रास देत होता, अशी गंभीर बाब तक्रारीत समोर आली आहे. आरोपीने त्रास देणे थांबवले नाही, म्हणून आईने पोलिसांत धाव घेतली.
या दोन्ही घटनांमुळे अमरावती सेक्स स्कँडल प्रकरण पुन्हा एकदा चर्चेत आले आहे. पोलिसांनी दोन्ही प्रकरणांची जोडणी तपासण्यास सुरुवात केली असून, लवकरच अधिक माहिती समोर येण्याची शक्यता आहे. परतवाडा परिसरात लैंगिक शोषणाच्या घटनांबाबत स्थानिक स्तरावर भीतीचे वातावरण निर्माण झाले आहे.
