एसटी कर्मचाऱ्यांचा दोन महिन्यांचा पगार थकला; दिवाळीच्या तोंडावर आंदोलनाचा इशारा

पुणे: ग्रामीण भागाची जीवन वाहिनी असलेल्या एसटी सेवेतील कर्मचारी दिवाळीच्या तोंडावर आंदोलनाचे अस्त्र उपसण्याच्या तयारीत आहेत. कोरोनाच्या संकटामुळे गेल्या काही महिन्यांपासून एसटीच्या कर्मचाऱ्यांना वेतन मिळालेले नाही. त्यासाठी राज्यातील एसटी कामगार पुन्हा एकदा आक्रोश करणार आहेत. प्रलंबित वेतनासाठी 9 नोव्हेंबरला प्रत्येक एसटी कर्मचारी त्यांच्या कुटुंबासोबत स्वतःच्या घराबाहेर आक्रोश आंदोलन करतील. (ST bus employees agitation for pending salary)

दिवाळीपर्यंत कर्मचाऱ्यांचे थकीत वेतन अदा करावे. तसेच एसटी महामंडळाला तातडीने दोन हजार कोटींची मदत करावी, अशी मागणी कर्मचारी संघटनांकडून करण्यात आली आहे. आतापर्यंत राज्यभरात दोन हजारांहून अधिक कर्मचारी कोरोनाबधित झाले असून आत्तापर्यंत 74 जणांचा मृत्यू झाला आहे. आम्हा सर्वांची दिवाळी चांगली जावी, यासाठी मुख्यमंत्री उद्धव ठाकरे यांनी लवकर निर्णय घ्यावा, असे कर्मचाऱ्यांनी सांगितले. त्यामुळे आता राज्य सरकार एसटी कर्मचाऱ्यांना दिलासा देणार का, याकडे सर्वांचे लक्ष लागले आहे.

दररोज एसटी कर्मचारी चालक, वाहक, यांत्रिकी, सफाई कामगार आपला स्वतःचा जीव धोक्यात घालून अहोरात्र सेवा बजावत आहेत. केवळ मुंबईतीलच नव्हे तर ठाणे, पालघर, रायगड अशा विविध विभागातून एसटी कर्मचारी सध्या मुंबईत अत्यावश्यक सेवा बजावण्यासाठी कार्यरत आहेत. परंतु, कोरोनाच्या संकटकाळात वेळेवर पगार न झाल्यामुळे कर्मचाऱ्यांची आर्थिक अवस्था बिकट झाली आहे. कोरोनामुळे अवांतर खर्च वाढले असताना बिनापगार संसार कसा चालवायचा, या विवंचनेत एसटी कर्मचारी जगत आहेत.

यापूर्वी कोरोनाच्या काळात सोशल डिस्टन्सिंगच्या निर्बंधामुळे एसटीतून मर्यादित संख्येपर्यंतच प्रवासी वाहून नेण्याची मुभा होती. यामुळे एसटीला मोठा आर्थिक फटका बसला होता. तिकीटाच्या रक्कमेतून एसटीच्या इंधनाचाही खर्च निघत नव्हता. याचा परिणाम कर्मचाऱ्यांच्या वेतनावर झाला होता. एसटीचे उत्पन्नच बंद झाल्याने गेल्या अनेक महिन्यांपासून कर्मचाऱ्यांचे पगार थकले आहेत. याविषयी एसटी कर्मचाऱ्यांनी राज्य सरकारकडे वेळोवेळी दाद मागितली. परंतु, अद्यापपर्यंत कोणताही ठोस निर्णय झालेला नाही.

संबंधित बातम्या:

एसटी कर्मचाऱ्यांना राज्य सरकारने वाऱ्यावर सोडलं, निरंजन डावखरेंची अनिल परब यांच्यावर टीका

अत्यावश्यक सेवेत काम करणाऱ्या एसटी कर्मचाऱ्यांना प्रोत्साहन भत्ता, परिवहन मंत्र्यांची घोषणा

एसटी बंद, महिनाअखेर आला, पगार कसा? एसटी कर्मचाऱ्यांच्या पगाराचा मोठा प्रश्न सुटला

नागपुरात ‘कोरोना इफेक्ट’, चहा टपरी ते दारुची दुकानं बंद, एसटीत एका सीटवर एक प्रवासी

(ST bus employees agitation for pending salary)