VIDEO | बदलापूरच्या रासायनिक कंपनीत गॅस गळती, कारण काय?
सुदैवाने यात कोणतीही जीवितहानी झालेली नाही. तसेच अग्निशमन दलाने तात्काळ परिस्थिती नियंत्रणात आणल्याने मोठी दुर्घटना टळली. (Badlapur Chemical Factory Gas Leak)
बदलापूर : बदलापूरच्या (Badlapur) एमआयडीसी परिसरातील एका कंपनीत (Chemical Factory) रासायनिक गॅसगळती (Gas Leak) झाल्याची घटना समोर आली आहे. रिऍक्टरमध्ये सल्फ्युरिक अॅसिड जास्त पडल्याने ही गॅसगळती झाल्याची प्राथमिक माहिती समोर आली आहे. या दुर्घटनेनंतर परिसरातील नागरिकांना श्वास घेण्यास अडचणींचा सामना करावा लागला. सुदैवाने यात कोणतीही जीवितहानी झालेली नाही. तसेच अग्निशमन दलाने तात्काळ परिस्थिती नियंत्रणात आणल्याने मोठी दुर्घटना टळली. (Badlapur Chemical Factory Gas Leak)
दोन तासांनी परिस्थितीवर नियंत्रण
बदलापूरच्या एमआयडीसीत काल (4 जून) रात्री जवळपास 10.22 मिनिटांनी रासायनिक कंपनीत गॅस गळती झाल्याने एकच खळबळ उडाली. यामुळे शिरगाव, आपटेवाडी भागात अनेक लोकांना श्वास घ्यायला त्रास होऊ लागला. तसेच या घटनेनंतर परिसरात मोठी घबराट पसरली. जवळपास दोन तासांनी म्हणजे रात्री 11.24 मिनिटांनी अग्निशमन दलाने परिस्थितीवर नियंत्रण मिळवले. सध्या ही परिस्थिती नियंत्रणात असून कोणतीही जीवितहानी झालेली नाही, असे ठाणे महानगरपालिकेने सांगितले आहे.
नेमकं काय घडलं?
बदलापूर एमआयडीसीत नोबेल इंटरमिडीएट्स नावाची रासायनिक कंपनी आहे. या कंपनीतील रिऍक्टरमध्ये काल रात्री ही गॅस गळती झाली. या रिऍक्टरमध्ये सल्फ्युरिक अॅसिड आणि मिथाईल बेंझाईन एकत्र केलं जात होतं. मात्र त्यावेळी यात सल्फ्युरिक अॅसिड जास्त पडल्याने अचानक रिऍक्टरमधून गॅस लीक झाला. त्यानंतर काही क्षणातच हा गॅस आजूबाजूच्या परिसरात पसरला.
परिस्थिती पूर्णपणे नियंत्रणात
हा गॅस ज्वलनशील नसला, तरी त्यामुळे परिसरातल्या लोकांना श्वास घ्यायला त्रास होणं, डोळे जळजळणं असे त्रास होऊ लागले. याबाबतची माहिती मिळताच अग्निशमन दलाने तात्काळ घटनास्थळी धाव घेतली. त्यानंतर ही गळती रोखण्यात आली. त्याशिवाय रिऍक्टरचं कुलिंग ऑपरेशन केलं. या घटनेत कुणालाही दुखापत झालेली नाही. तसेच सध्या ही परिस्थिती पूर्णपणे नियंत्रणात असल्याची माहिती मुख्य अग्निशमन अधिकारी भागवत सोनोने यांनी दिली आहे.
पाहा व्हिडीओ
#WATCH | A gas leak from a factory in Maharashtra’s Badlapur was reported at around 10:22 pm on Thursday. People in the area were having trouble breathing. Fire brigade stopped the leak at 11:24 pm. The situation is under control. No one injured: Thane Municipal Corporation pic.twitter.com/djdZY77DAE
— ANI (@ANI) June 3, 2021
(Badlapur Chemical Factory Gas Leak)
संबंधित बातम्या :
Oxygen Plant Leak | सांगलीमध्ये ऑक्सिजन प्लांटला गळती, जिल्हाधिकाऱ्यांची घटनास्थळाला भेट
Weather Alert: मान्सूनचा पाऊस वेशीवर दाखल; कोकण किनारपट्टीवर काळ्या ढगांची गर्दी
