नारायण राणेंना हरवणारा तळ कोकणातील ठाकरे गटाचा बडा नेता ACB च्या रडारवर VIDEO

तळ कोकणातील उद्धव ठाकरे गटाचा बडा नेता ACB च्या रडारवर आला आहे. सिंधुदुर्ग जिल्ह्यातील उद्धव ठाकरे गटाचे नेते आणि माजी आमदार वैभव नाईक यांची रत्नागिरी भ्रष्टाचार विरोधी पथक ACB कडून चौकशी सुरु आहे. रत्नागिरी एसीबीने कणकवली नगर पंचायतीला पत्र लिहून वैभव नाईक यांच्या मालमत्तेची माहिती मागवली आहे. वैभव नाईक यांनी 2002 आणि 2006 साली दोन दुकान गाळे खरेदी केले होते. हे दुकान गाळे दोन आहेत की एक याची रत्नागिरी ACB ने कणकवली नगर पंचायतीकडे माहिती मागितली आहे. 2022 सालापासून वैभव नाईक यांची चौकशी सुरु आहे. “जी कुठली चौकशी आहे, त्याला सामोरा जाईन. कुठल्याही दबावाला बळी पडणार नाही” असं वैभव नाईक यांनी म्हटलं आहे.

“येणाऱ्या काळात जी काही चौकशी आहे, त्याला उत्तर देईन. पाचवर्षांपासून माझी चौकशी सुरु आहे. अनेकांच्या चौकशा सुरु झाल्या त्यानंतर बंद झाल्या. माझी आजही चौकशी सुरु आहे. हा अन्याय आहे. मी या विरोधात लढणार आहे” असं वैभव नाईक म्हणाले. कोकणात उद्धव ठाकरे गटाला गळती लागली आहे. आधी राजापूरचे माजी आमदार राजन साळवी, त्यानंतर काल बाळ माने यांनी उद्धव ठाकरे गटाला सोडचिठ्ठी दिली. राजन साळवी एकनाथ शिंदे शिवसेनेत आहेत तर बाळ माने भाजपमध्ये प्रवेश करु शकतात. आता कोकणात ठाकरे गटाचे जे मोजके प्रमुख नेते उरले आहेत, त्यात वैभव नाईक यांचा समावेश होतो.

जायंट किलर नेता

वैभव नाईक हे जायंट किलर आहेत. 2014 विधानसभा निवडणुकीत त्यांनी दिग्ग्ज भाजप नेते नारायण राणे यांचा पराभव केला होता. राणे आणि नाईक कुटुंबाचं राजकीय वैर जुनं आहे. त्यानंतर वैभव नाईक सलग दोन टर्म कुडाळमधन निवडून आले. 10 वर्ष त्यांनी कुडाळ विधानसभा मतदारसंघाचं प्रतिनिधीत्व केलं. 2024 च्या विधानसभा निवडणुकीत वैभव नाईक यांना नारायण राणे यांचे ज्येष्ठ सुपूत्र निलेश राणे यांनी पराभूत केलं.