मोठी बातमी! महाराष्टातील खासदार युद्धभूमीत अडकला, कार्यालयाने दिली महत्त्वाची अपडेट

इस्रायल आणि अमेरिका सातत्याने इराणवर हल्ले करत आहेत. त्यामुळे सगळीकडे भीतीचे वातावरण आहे. इराणकडूनही या हल्ल्यांना प्रत्युत्तर दिले जात आहे. इराणने दुबईसह आखाती देशांमधील अमेरिकेच्या लष्करी तळांवर हल्ले केले आहेत. तसेच दुबई आणि इतर काही शहरांमधील महत्त्वाच्या इमारतींनाही लक्ष्य करण्यात आले आहे. राज्यासह देशातील हजारो लोक युद्ध भूमीत अडकून पडले आहेत. यात राज्यातील एका खासदाराचाही समावेश आहे. जालना मतदार संघाचे खासदार डॉक्टर कल्याण काळे दुबईत अडकले असल्याची माहिती समोर आली आहे. यानंतर आता त्यांच्या कार्यालयाने महत्त्वाची माहिती दिली आहे.

खासदार कल्याण काळे दुबईत अडकले

इराण आणि इस्रायल-अमेरिका यांच्यात भयंकर युद्ध सुरू आहे. दोन्ही बाजूंनी एकमेकांवर हल्ले होत आहे. इराणकडून दुबईवर हल्ले केले जात आहेत. त्यामुळे आता यूएईमध्ये विमानसेवा बंद असल्याने जालन्याचे खासदार डॉक्टर कल्याण काळे काही नातेवाईकांना दुबईत अडकले असल्याची माहिती समोर आली आहे. त्यानंतर आता जनसंपर्क कार्यालयाने कल्याण काळे हे सुरक्षित असल्याची माहिती दिली आहे.

खासदार काळे पूर्णपणे सुरक्षित

खासदार डॉक्टर कल्याण काळे यांच्या जनसंपर्क कार्यालयाने फेसबूकवर एक पोस्ट शेअर केली आहे. यात त्यांनी म्हटले की, ‘खासदार डॉ.कल्याण काळे हे परिवारासह पूर्वनियोजित दौऱ्यानिमित्त दुबई येथे गेले आहेत. त्यांचा आमच्याशी नियमित संपर्क सुरू आहे. खासदार काळे पूर्णपणे सुखरूप असून त्यांच्या प्रकृती व सुरक्षिततेबाबत कोणतीही चिंता करण्याचे कारण नाही. सर्व कार्यकर्ते, नागरिक व हितचिंतकांनी कोणत्याही अफवांवर विश्वास ठेवू नये, असे आवाहन करण्यात येत आहे.’

नागपूरचे पर्यटक दुबई मध्ये अडकले

नागपूरच्या चिकटे आणि घारफेंडे कुटुंबातील 9 जण दुबईत अडकले आहेत. पर्यटनासाठी आखाती देशात गेलेल्या या लोकांना 3 मार्चला विमानाने परत यायचे होते. मात्र दुबई विमानतळ बंद केल्याने पर्यटक दुबईत मध्येच अडकून पडले आहेत. हॉटेल मधून बाहेर जाण्यास पर्यटकांना मनाई करण्यात आली आहे. हॉटेल कडून नाश्ता, जेवणाची सोय उपलब्ध करून देण्यात आली आहे. मिसाईल हल्ल्यामुळे सर्वांमध्ये घबराटीचे वातावरण पसरले आहे. दुबई मधून सुरक्षित बाहेर काढण्यासाठी या पर्यटकांनी सरकारला विनंती केली आहे.