मोबाईल युजरची दिवाळी, आता रिचार्ज प्लान होणार तब्बल 50 टक्क्यांनी स्वस्त, किमती थेट एवढ्या कमी होणार…

आज काल आपल्याला प्रत्येकाच्या हातात स्मार्ट फोन दिसून येतो. गेल्या काही वर्षांमध्ये मोबाईल वापरकर्त्यांच्या संख्येमध्ये झपाट्याने वाढ झाली आहे. मात्र दिवसेंदिवस मोबाईल रिचार्जचे प्लान महागत होत असल्यानं त्याची मोठी आर्थिक झळ ग्राहकांना सोसावी लागत आहे. हीच गोष्ट लक्षात घेऊन आता ट्रायकडून एक नवा प्लान तयार करण्यात आला आहे. ट्रायच्या नव्या नियमानुसार आता ग्राहकांना स्वस्तात मोबाईलचा रिचार्ज प्लान मिळणार आहे. जे लोक डेटा प्लान वापरत नाहीत, त्यांना देखील मोबाईल रिचार्जसाठी जास्त पैसे मोजावे लागत होते, परंतु आता असं होणार नाहीये. ट्रायच्या नव्या नियमांमुळे ग्राहकांना मोठा दिलासा मिळणार आहे.

काय आहे ट्रायचा नवा प्लान?

सध्या टेलिकॉम क्षेत्रातील कंपन्यांकडून फक्त कॉल आणि एसएमएससाठी जे प्लान तयार करण्यात येतात, त्या प्लानची वैधता मर्यादीत असते, परंतु जर नवीन नियम लागू झाला तर सध्या ज्या कंपन्या 28, 56, 84 अशा दिवसांची वैधता असलेले डेटा प्लॅन देतात, त्या कंपन्यांना या कालावधीचे वैधता असलेले फक्त कॉल आणि एसएमएससाठीचे प्लॅन देखील उपलब्ध करून देणं बंधकारक असणार आहे. हे प्लान डेटा पॅकच्या तुलनेत स्वस्त असणार आहेत. जर तुम्हाला तुमच्या मोबाईल रिचार्जमध्ये टेडाची सुविधा नको असेल तर तो पर्याय निवडण्याचं स्वातंत्र्य तुम्हाला मिळणार आहे, आणि अनावश्यक खर्चातून देखील तुमची सुटका होणार आहे.

कोणते प्लान होणार स्वस्त?

मिडिया रिपोर्टनुसार ट्रायचं असं म्हणणं आहे की, ज्या लोकांना इंटरनेट डेटाची गरज नाही, जे लोक मोबाईलचा वापर फक्त एसएमएस आणि कॉलिंगसाठीच करतात त्यांना त्यासाठी वेगळा प्लान निवडण्याचा पर्याय उपलब्ध करून देणं गरजेचं आहे. सध्या स्थितीमध्ये जे लोक मोबाईल डेटाचा वापर करत नाहीत, मोबाईलचा वापर ते फक्त फोन आणि एसएमएससाठीच करतात त्यांना पण त्यासाठी डेटा पॅकचीच निवड करावी लागते. परंतु आता याला आळा बसणार आहे. जर ट्रायचा नवा नियम लागू झाल्यास जे लोकं फक्त मोबाईलचा वापर कॉलिंगसाठीच करतात त्यांचा मोठा फायदा होणार आहे, कारण डेटा नसलेले रिचार्ज प्लॅन या नव्या नियमामुळे तब्बल 50 टक्क्यांनी स्वस्त होण्याची शक्यता आहे. तसेच जो व्यक्ती एकचवेळी दोन सीम वापरतो अशा व्यक्तीला त्याचं दुसरं सीम सुरू ठेवण्यासाठी देखील या प्लॅनचा फायदा होणार आहे.