सीजेपीच्या आशुतोष-सौरव यांची न्यायालयीन कोठडी वाढवली, ममता बॅनर्जी भडकल्या, म्हणाल्या…

कॉक्रोच जनता पार्टीचे नेते आशुतोष रांका आणि सौरव दास यांच्या अडचणीत आणखी वाढ होताना दिसत आहे. दोघांची न्यायालयीन कोठडी दोन दिवसांनी वाढवण्यात आली आहे. परंतु दोघांची न्यायालयीन कोठडी दोन दिवसांनी वाढवल्याने माजी मुख्यमंत्री ममता बॅनर्जी यांनी संताप व्यक्त केला आहे. ममता बॅनर्जी यांनी सोशल मीडियावर ‘एक्स’वर पोस्ट करत सत्ताधाऱ्यांवर टीका केली. त्यानंतर कॉक्रोच जनता पार्टीने त्यांचे आभार मानले आहेत. तुमच्या पाठिंब्यासाठी आभारी आहोत, असे त्यांनी म्हटलं.

ममता बॅनर्जी यांनी सोशल मीडियावर पोस्ट करत म्हटलं की, एक धोकादायक व्हायरस आहे. या व्हायरसकडून दररोज लोकशाहीवर हल्ले करत आहेत. ‘जेन-झी’च्या तरुण-तरुणींचा छळ थांबवा. जे आता सत्तेत आहे, ते उद्या सत्तेत नसतील’. ममता बॅनर्जी पुढे म्हणाल्या, ‘कोलकातापासून दिल्ली, मुंबई….सर्व देशात अत्याचाराचा कळस गाठला आहे. आमच्या पूर्वजांनी ब्रिटिश काळात शासकांचा त्रास सहन केला आहे. त्यानंतर त्यांच्याविरोधात लढाई जिंकलो. आता  सरकार पुरस्कृत दहशतवाद सुरू आहे.  पोलिसांकडून हा अत्याचार सुरू आहे’.

‘अत्याचार जास्त दिवस टिकणारा नाही. भारताची लोकशाही वाचवणारे मोठ्या ताकदीने उभे राहतील. तेव्हाच सत्तेत बसलेल्या गर्विष्ठ नेत्यांचे डोळे उघडतील. जेव्हा जनता जिंकेल, त्यादिवशी लोकशाहीची हत्या करणाऱ्यांचाही खात्मा होईल. आम्ही लोकशाहीवर विश्वास ठेवणारे आहोत. त्यामुळे आशुतोष आणि सौरव यांची तातडीने सुटका करा, असे त्यांनी म्हटलं आहे.  तर कॉक्रोच जनता पार्टीचे अभिजीत दिपके यांनी सौरव दास, आशुतोष रांका यांची हेतपूर्वक न्यायालयीन कोठडी वाढवली, दोघांची सुटका करण्यात दिरंगाई केली जात आहे, असा आरोप दिपकेंनी केला.

Thank you for your support Ma’am!

— Cockroach Janta Party – CJP (@Cockroachisback) October 19, 2026

दोघांची कोठडी दोन दिवसांनी वाढवली आहे. विशेष दंडधिकाऱ्यांनी हा निर्णय सुनावलाय. जंतर-मंतरवर विनापरवानगी प्रवेश करून झेंडा फडकवल्याने दोघांना दिल्ली पोलिसांनी ताब्यात घेतले होते. आता या प्रकरणाची सुनावणी ही 21 ऑक्टोबर रोजी होणार असल्याची माहिती मिळतेय. आता या दोघांची रवानगी तिहार तुरुंगात करण्यात आली. कोठडीत वाढ झाल्याने दोघांना जामिनासाठी आणखी दोन दिवस वाट पाहावी लागणार आहे.