Delhi Red Fort Blast : दिल्ली स्फोटातील i-20 कारचा मालक कोण? नाव समोर येताच खळबळ!

Delhi Blast : दिल्लीच्या लाल किल्ला परिसरात भीषण स्फोट झाला आहे. या स्फोटामुळे एकूण 13 जणांचा मृत्यू झाला आहे. तर अनेकजण जखमी झाले असून त्यांच्यावर रुग्णालयात उपचार केले जात आहेत. मृतांचा आकडा वाढण्याची भीती व्यक्त केली जात आहे. स्फोटाची ही माहिती मिळताच पंतप्रधान नरेंद्र मोदी यांनी दु:ख व्यक्त केले आहे. तर दुसरीकडे केंद्रीय गृहमंत्री अमित शाहा हेदेखील सक्रिय झाले आहेत. त्यांनी दिल्ली पोलिसांना तत्काळ फोन कॉल करून घडलेल्या घटनेची माहिती घेतली आहे. त्यांनी रुग्णालयात जाऊन जखमी व्यक्तींचीही भेट घेतली आहे. असे असतानाच आता या स्फोटाबाबत एक मोठी माहिती समोर आली आहे. या कारमालकाचे नाव समोर आले असून पोलीस अधिक तपास करत आहेत.

नेमकी काय अपडेट मिळाली?

मिळालेल्या माहितीनुसार दिल्लीतील लाल किल्ला परिसरात सुभाष मार्गाजवळच्या सिग्नलजवळ हा स्फोट झाला आहे. अगोदर एका व्हॅनमध्ये हा स्फोट झाल्याचे सांगितले जात होते. आता मात्र खुद्द अमित शाहा यांनी हा स्फोट आय-20 या ह्युंदाई कंपनीच्या कारमध्ये स्फोट झाल्याचे सांगितले आहे. ही कार आता पोलिसांनी, फॉरेन्सिक टीमने ताब्यात घेतली असून तिची तपासणी केली जात आहे. कारमध्ये असलेले सर्व पुरावे गोळा केले जात आहे. या गाडीमध्ये नेमके काय होते? काही स्फोटकं होती का? याचा तपास केला जात आहे.

स्फोट झालेली कार नेमकी कोणाची?

हा स्फोट होताच पोलिसांनी तपासाची चक्रं फिरवली आहेत. घटनास्थळाच्या परिसरातील सर्व सीसीटीव्ही आता ताब्यात घेतले जात आहेत. सीसीटीव्हींची चाचणी करून हा स्फोट नेमका कसा झाला, याचा शोध घेतला जात आहे. आतापर्यंत केलेल्या तपासातून आय-20 कारच्या मालकाचे नाव समोर आले आहे. या कारची पासिंग हरियाणातील गुरुग्राम येथील असून कारचा मालक ही नदीम खान नावाची व्यक्ती आहे.

अमित शाहा यांनी नेमके काय सांगितले?

दरम्यान, अमित शाहा यांनी दिलेल्या माहितीनुसार स्फोटाच्या घटनेची सर्व अंगांनी तपासणी केली जात आहे. तपासणीतून जे काही समोर येईल ते जनतेपुढे मांडले जाईल, असे अमित शाहा यांनी सांगितले आहे. त्यामुळे आता भविष्यात नेमकी कोणती माहिती समोर येणार? हे पाहणे महत्त्वाचे ठरणार आहे.