सणासुदीच्या काळात विमान तिकीटांमध्ये 68 टक्क्यांपर्यंत वाढ, दिवाळीनंतर तरी प्रवाशांना पुन्हा मिळणार का सुट?

आागामी काळातील सण-उत्सवाच्या पार्श्वभूमीवर विमान कंपन्यांनी आपल्या तिकीट दरात प्रचंड वाढ केली असून काही मार्गांवर ती 50 टक्के पेक्षा जास्त असेल. सगळ्यात महत्वाची बाब म्हणजे भारतात हे वाढलेले तिकीट दर लवकर कमी होण्याची शक्यता नाही. भारतातील सर्वात महत्वाचा आणि मोठा असलेला दिवाळीचा सण अगदी काही दिवसांवर आला असताना विमान तिकीटांमध्ये प्रचंड वाढ झाली आहे. दिल्ली-हैदराबाद मार्गावर तर ती वाढ 68 टक्के एवढी असेल. याशिवाय मुंबई-कलकत्ता 51 टक्के, दिल्ली-गोवा 39 टक्के आणि मुंबई-बेंगळूर मार्गावर ही वाढ 37 टक्के असणार आहे. विशेष म्हणजे हे वाढलेले दर दिवाळीनंतरही कमी होण्याची शक्यता खूप कमी आहे.

त्याचे कारण म्हणजे, ऑक्टोबर महिन्यात वाढवलेले विमान इंधनाचे दर. क्रेडिट रेटींग एजन्सी आयसीआरएच्या अहवालानुसार, विमान प्रवासाच्या दरात झालेली वाढ ही इंधनाच्या दरवाढीमुळे झाली आहे. तर इंधन दरवाढ ही डॉलरच्या तुलनेत रूपयाची कमजोरी आणि पश्चिम आशियातील सुरू असलेला संघर्षामुळे झाल्याचे आयसीआरएने सांगितले.

तीन महत्वाची कारणे ज्यामुळे हवाई प्रवास महागला

1. विमान प्रवास दरात वाढ होण्यामागचे सर्वात महत्चाचे कारण एटीएफ म्हणजे विमान इंधनाच्या दरातील वाढ होय. 1 ऑक्टोबर नंतर साधारणतः 16 रूपये प्रती लिटर वाढ झाल्यानंतर एटीएफ 137 रूपयांवर पोहचलंय. 2. डॉलरच्या तुलनेत रूपयाची असलेली कमजोरी कारण विमान कंपन्यांचे 30 ते 50 टक्के खर्च डॉलरमध्ये होतो. 3. पश्चिम आशियातील वाढलेला संघर्ष ज्यामुळे अनेकवेळा कंपन्यांना मार्ग बदलावा लागतोय आणि खर्च वाढतोय.

विमान प्रवासाच्या या सगळ्या वाढत्या महागाईवर सरकारचे लक्ष असून ते डीजीसीएच्या अंतर्गत काही नियम बनवत आहेत. ते नियम जारी झाल्यानंतर यात अजून स्पष्टता येण्याची शक्यता आहे. इराण आणि अमेरिका युद्धात कच्च्या तेलाच्या किंमती झपाट्याने वाढताना दिसल्या. त्यावेळी भारतीय विमान कंपन्यांनी तिकिट दरात मोठी वाढ केली. त्यानंतर आता पुन्हा वाढ होत आहे. ज्यामुळे दिवसेंदिवस विमानाच्या तिकिटाच्या दरात वाढ होताना दिसत आहे. विमानाच्या प्रवासासाठी आता ज्यादाचे पैसे मोजावी लागणार आहेत.