‘इराणचा अमेरिकेवर मोठा विजय; 47 वर्षांमध्ये पहिल्यांदाच असं घडलं’, ट्रम्प यांच्यासमोर ठेवली मोठी अट

इराण आणि अमेरिकेमध्ये अजूनही संघर्ष कायम आहे. दोन्ही कडूनही हल्ले सुरूच आहेत. त्यामुळे अजूनही मध्य पूर्वेत मोठा तणाव पहायला मिळत आहे. याचदरम्यान इराणच्या एका वरिष्ठ अधिकाऱ्याकडून मोठा दावा करण्यात आला आहे. आम्ही अमेरिकेवर मोठा विजय मिळवला आहे. गेल्या 47 वर्षांमधील हा आमचा पहिला सैन्य विजय आहे, असं आम्ही मानतो असं इराणच्या या अधिकाऱ्याने म्हटलं आहे. अमेरिकेसोबत युद्धविरामाची चर्चा करण्यासाठी आता इराण एका वेगळ्या भूमिकेत आहे. डोनाल्ड ट्रम्प यांची देखील ही मोठी परीक्षा असेल असंही या इराणी अधिकाऱ्याने म्हटलं आहे. मोहसेन रजाई असं या अधिकाऱ्याचे नावं आहे. मोहसेन रजाई हे इराणचे सुप्रीम लीडर मोजतबा खामेनेई यांचे सैन्य सल्लागार आहेत, सीएनएनशी बोलताना त्यांनी हा दावा केला आहे. इराण अमेरिकेसोबत प्रत्येकवेळी हारत होता, परंतु ही पहिलीच वेळ आहे, आम्ही अमेरिकेवर मोठा विजय मिळवला आहे, गेल्या 47 वर्षांच्या इतिहासामध्ये हे पहिल्यांदाच घडलं असल्याचा दावा त्यांनी केला आहे.

पुढे बोलताना मोहसेन रजाई यांनी म्हटलं की सध्या तरी युद्ध थांबलेलं आहे, परंतु युद्धविराम केवळ नावालाच झाला आहे, अजूनही दोन्ही देशांमध्ये मोठा संघर्ष असून, मध्यपूर्वेत तणावाची परिस्थिती आहे. अजूनही पूर्णपणे युद्धविराम झालेला नाही, पूर्णपणे युद्धविराम केव्हा होणार हे अमेरिकेनं आमची जी 24 अब्ज डॉलरची संपत्ती फ्रीज केली आहे, ती ते केव्हा मुक्त करणार यावर अवलंबून असल्याचं रजाई यांनी म्हटलं आहे.

जेव्हा अमेरिका आणि इराणमध्ये पूर्णपणे युद्धविराम होईल, तेव्हा अमेरिकेनं पहिल्या टप्प्यामध्ये आमची 12 अब्ज डॉलरची संपत्ती मुक्त करावी, त्यानंतर दुसऱ्या टप्प्यात उर्वरीत 12 अब्ज डॉलरची संपत्ती मुक्त करावी, अशी मागणी देखील रजाई यांनी केली आहे. आता निर्णय डोनाल्ड ट्रम्प यांच्या हातात आहे. जर अमेरिकेनं पुन्हा आमच्यासोबत युद्ध केलं तर आम्ही अमेरिकेच्या सैन्य ठिकाणांवर भीषण हल्ले करू, त्यानंतर या युद्धाचा वणवा फारसच्या खाडीपासून तांबडा समुद्र ते भूमध्य समुद्रापर्यंत पसरेल, अशी धमकी देखील यावेळी इराणने अमेरिकेला दिली आहे.