निवडणूक आयोग, मतचोरी आणि SIR… राहुल गांधींच्या चहापानात विरोधकांची पुढील रणनीती ठरली; पत्रकार परिषदेत मोठी घोषणा

आज इंडिया आघाडीने पत्रकार परिषद घेतली आहे. याआधी आघाडीच्या नेत्यांची बैठक पार पडली. या बैठकीत आणि चहा-नाश्त्यादरम्यान निवडणूक आयोगाविरोधातील याचिका, ‘मतचोरी’चा मुद्दा आणि एसआयआर प्रक्रियेसंदर्भातील भविष्यातील संयुक्त रणनीतीवर चर्चा झाली. काँग्रेस नेत्या सोनिया गांधी, काँग्रेस अध्यक्ष मल्लिकार्जुन खर्गे, हिमाचल प्रदेशचे मुख्यमंत्री सुखविंदर सिंग सुखू, शिवसेना (यूबीटी) खासदार संजय राऊत, आयसाच्या अध्यक्षा नेहा बोरा आणि नागरी समाजाचे इतर सदस्य राहुल गांधींच्या चहा पार्टीला आधीच उपस्थित होते. समाजवादी पक्ष आणि काँग्रेसचे अनेक खासदारही उपस्थित होते. बैठकीनंतर पत्रकार परिषदेत आघाडीने पुढील निर्णय सांगितला आहे.

लोकसभेतील विरोधी पक्षनेते राहुल गांधी हे मुख्य निवडणूक आयुक्त ज्ञानेश कुमार यांच्या विरोधात विरोधी पक्षांना एकत्र आणण्याचा प्रयत्न करत आहेत. यासाठी त्यांनी आपल्या निवासस्थानी ‘इंडिया’ आघाडीच्या नेत्यांसाठी चहापानाच्या कार्यक्रमाचे आयोजन केले होते. या कार्यक्रमाला इंडिया गटातील अनेक प्रमुख नेते उपस्थित होते. या बैठकीच्या माध्यमातून राहुल गांधींचा उद्देश विरोधी पक्षांना एकत्र आणणे आणि त्यांना मुख्य निवडणूक आयुक्तांच्या विरोधात पुन्हा एकदा रस्त्यावर उतरून आंदोलन करण्यास प्रोत्साहित करणे हा आहे. या बैठकीनंतर आघाडीच्या प्रमुख नेत्यांनी पत्रकार परिषद घेतली आहे. यात त्यांनी इंडिया आघाडीची पुढची दिशा सांगितली आहे.

राहुल गांधी म्हणाले की, ज्ञानेश कुमार यांच्या विरोधातील या लढ्यात संपूर्ण विरोधी पक्ष एकजूट आहे. ज्ञानेश कुमार यांनी संपूर्ण निवडणूक प्रणाली उद्ध्वस्त केली आहे. एक प्रकारे लोकशाहीची हत्या झाली आहे. आम्ही आमचा लढा सुरूच ठेवणार आहोत. आता मुख्य निवडणूक आयुक्त ज्ञानेश कुमार यांचा राजीनामा हेच आमचे ध्येय आहे. मतचोरीत सामील असलेल्या प्रत्येकाला जबाबदार धरले जाईल. आता लोकशाही वाचवणे हे आमचे ध्येय आहे. आम्ही पंतप्रधान मोदी, ज्ञानेश कुमार आणि अमित शाह यांना सोडणार नाही, असं म्हणत त्यांनी आघाडीचे धैय्य सांगितलं आहे.

राहुल गांधींच्या निवासस्थानी इंडिया अलायन्सच्या नेत्यांच्या बैठकीनंतर काँग्रेस अध्यक्ष मल्लिकार्जुन खर्गे म्हणाले की, आदल्या दिवशी झालेले आंदोलन यशस्वी झाले. राहुल यांच्या निवासस्थानी झालेल्या चहापानाच्या चर्चेदरम्यान, या बैठकीत एसआयआर आणि मुख्य निवडणूक आयुक्त ज्ञानेश कुमार यांच्यावरही चर्चा झाली. देशातील जनता मुख्य निवडणूक आयोगाच्या (सीईसी) मुद्द्यावर अत्यंत गंभीर आहे. संपूर्ण विरोधी पक्ष एकजूट आहे.

टीएमसी खासदार सागरिका घोष म्हणाल्या, ज्ञानेश कुमार मतचोरीचे सूत्रधार आहेत. जोपर्यंत त्यांना हटवले जात नाही, तोपर्यंत आमचा लढा सुरूच राहील. त्यांनी मतं चोरण्यासाठीच एसआयआर तयार केला. अशा ज्ञानेश कुमार यांना बडतर्फ केले पाहिजे. आम्ही सर्व एक आहोत. ज्येष्ठ वकील प्रशांत भूषण म्हणाले की, आंदोलन करणे हा आमचा हक्क आहे. आता नागरी समाज आणि शेतकरी संघटनाही या आंदोलनात सामील होतील.

समाजवादी पक्षाचे खासदार म्हणाले की, आम्ही विरोधी आघाडीसोबत आहोत. राष्ट्रवादी काँग्रेसच्या नेत्या सुप्रिया सुळे म्हणाल्या की, इंडिया अलायन्सचे आंदोलन सुरूच राहील. सरकार लोकशाही चिरडण्याची चूक करत आहे. डाव्या पक्षाचे नेते डी. राजा म्हणाले की, सरकार विरोधी पक्षांचा आवाज दाबून टाकत आहे. ज्ञानेश कुमार यांनी पायउतार झालेच पाहिजे. आरजेडी नेते तेजस्वी यादव म्हणाले की, घटनात्मक संस्थांचे अपहरण करण्याचा प्रयत्न झाला आहे. म्हणूनच आंदोलनाचे ठिकाण बदलण्यात आले. एक प्रकारे, ज्ञानेश गुप्ता यांना वाचवण्यासाठी लोकशाही चिरडली जात आहे.

शिवसेना नेते संजय राऊत यांनी मुख्य निवडणूक आयुक्त ज्ञानेश कुमार यांना माफिया संबोधत त्यांच्यावर जोरदार हल्ला चढवला आहे. ते म्हणाले की. ज्ञानेश कुमार हा माफिया आहे. त्याला लवकरात लवकर हटवायला हवे होते. पण सरकार स्वतःचे संरक्षण करण्यासाठी तसे करत नाही. आयसाच्या अध्यक्षा नेहा बोरा म्हणाल्या की, सर्वसामान्य माणसाच्या हक्कांना पायदळी तुडवले जात आहे. आंदोलन करण्याचा हक्क काढून घेणे चुकीचे आहे. भाजपने लोकशाहीवर हल्ला केला आहे.