केरळच्या कोच्चि विद्यापीठात आयोजित म्युजिक कॉन्सर्टमध्ये चेंगराचेंगरी, चौघांचा मृत्यू

कोच्चि | 25 नोव्हेंबर 2023 : केरळच्या कोच्चि विद्यापीठात म्युजिक कॉन्सर्टचं आयोजन करण्यात आलेलं. या कार्यक्रमावेळी चेंगराचेंगरी झाल्याची माहिती समोर आली आहे. या चेंगराचेंगरीत 4 जणांचा मृत्यू झालाय. गायिका निकिता गांधी गाणं गात असताना चेंगराचेंगरीची घटना घडली. हा कार्यक्रम विद्यापीठातील ओपन-एयर ऑडिटोरियममध्ये सुरु होता. यावेळी ही घटना घडलीय. संबंधित घटनेमुळे एकच खळबळ उडाली आहे.

नेमकं काय घडलं?

मिळालेल्या माहितीनुसार, ओपन-एयर ऑडिटोरियममध्ये कार्यक्रम सुरु होता. यावेळी अचानक पाऊस सुरु झाला. त्यामुळे कार्यक्रमात उपस्थित असणारे प्रेक्षक आतमध्ये सभागृहाच्या दिशेला पळाले. अचानक पाऊस सुरु झाल्याने प्रेक्षकांची भंबेरी उडाली. प्रेक्षक सैरावैरा सभागृहाच्या दिशेला पळाले. यामुळे मोठा गदारोळ झाला. चेंगराचेंगरी सारखी परिस्थिती निर्माण झाली.

या घटनेत दोन विद्यार्थी आणि दोन विद्यार्थीनींचा मृत्यू झाला. तसेच तीन जणांची प्रकृती गंभीर आहे. या चेंगराचेंगरीत 15 विद्यार्थी बेशुद्ध झाले आहेत. या घटनेत ज्या विद्यार्थ्यांचा मृत्यू झालाय त्यांना कलामासेरी मेडिकल कॉलेजला नेण्यात आलंय. संबंधित घटना आज संध्याकाळी सात वाजेच्या सुमारास घडली. विद्यापीठाचा टेक फेस्टचा आज शेवटचा दिवस होता.