Zudio ला सर्वात स्वस्त कपडे विकूनही कसा मिळतो नफा? बिझनेस स्ट्रॅटेजी ऐकून तुम्ही म्हणाल…
डी-मार्ट पेक्षा Zudio मध्ये कपडे इतके स्वस्त का मिळतात. सर्वात कमी किंमत असून देखील Zudio ला कसा मिळतो नफा. जाणून घ्या सविस्तर
ग्राहकांची गरज आणि पसंती अचूक ओळखली तर ग्राहकच तुमच्या ब्रँडची जाहिरात करू लागतात. याच व्यवसाय तत्त्वाचा प्रभावी वापर टाटा समूहाच्या ट्रेंट अंतर्गत येणाऱ्या ‘झुडिओ’ने केला आहे. कमी किमतीत फॅशनेबल कपडे उपलब्ध करून देत झुडिओने भारतीय रिटेल बाजारात अल्पावधीत मोठी लोकप्रियता मिळवली आहे.
मात्र, कमी किमतीत कपडे विकूनही झुडिओ मोठी कमाई कशी करते? यामागे काही महत्त्वाच्या व्यावसायिक रणनीती आहेत. यामध्ये प्रथम झुडिओचे व्यवसाय मॉडेल मोठ्या प्रमाणातील विक्रीवर आधारित आहे. प्रत्येक कपड्यावर मोठा नफा कमावण्याऐवजी कमी मार्जिन ठेवून मोठ्या संख्येने कपडे विकले जातात. त्यामुळे प्रति उत्पादन नफा कमी असला तरी एकूण विक्री मोठी असल्याने कंपनीला चांगला नफा मिळतो.
झुडिओ नवीन ट्रेंड लवकर ओळखून त्यानुसार आपली उत्पादने बदलते. त्यामुळे कपडे दुकानात दीर्घकाळ पडून राहण्याची शक्यता कमी होते आणि ‘डेड स्टॉक’चा खर्चही कमी होतो. ग्राहकांनाही कमी किमतीत नवीन ट्रेंडचे कपडे मिळतात.
मोठे फॅशन ब्रँड जाहिरातींवर मोठ्या प्रमाणात पैसा खर्च करतात. मात्र झुडिओला ग्राहकांकडूनच मोठ्या प्रमाणात प्रसिद्धी मिळते. सोशल मीडिया, विशेषतः Instagram Reels आणि ‘Zudio Haul’ व्हिडिओंमधून ग्राहक स्वतःच ब्रँडची चर्चा करतात. त्यामुळे पारंपरिक जाहिरातींवरील खर्च कमी ठेवण्यास मदत होते.
झुडिओचे ‘सेल्फ-सर्व्हिस’ मॉडेल स्टोअर चालवण्याचा खर्च कमी ठेवण्यास मदत करते. ग्राहक स्वतः कपडे पाहतात, निवडतात आणि खरेदी करतात. त्यामुळे पारंपरिक स्टोअरच्या तुलनेत मनुष्यबळाचा खर्चही नियंत्रित ठेवता येतो. त्यामुळे ग्राहकांना परवडणाऱ्या दरात फॅशनेबल कपडे देतानाच खर्चावर नियंत्रण ठेवण्याचे हे मॉडेल टाटा समूहाच्या यशस्वी रणनीतीचे उदाहरण ठरते.
