ना बियाणं, ना नर्सरीचं रोप; पुदिन्याच्या एका काडीपासून घरच्या कुंडीत उगवा भरपूर पुदिना, जाणून घ्या सोपी ट्रिक
बाजारातून आणलेल्या पुदिन्याच्या एका ताज्या काडीपासून तुम्ही घरच्या घरी नवीन रोप तयार करू शकता. यासाठी बियाणे किंवा नर्सरीतील रोपाची गरज नाही. योग्य माती, पाणी आणि सूर्यप्रकाशाची काळजी घेतली तर कुंडीतच भरपूर हिरवागार पुदिना उगवता येतो. जाणून घ्या पुदिन्याचे रोप लावण्याची आणि त्याची काळजी घेण्याची सोपी पद्धत.
पुदिन्याच्या काडीपासून रोप कसे तयार करायचे? - सर्वात पहिले बाजारातून हिरवी, ताजी आणि मजबूत पुदिन्याची काडी घेऊन या. काडीवर डाग, कुजलेला भाग किंवा कीड नसावी. साधारण १० ते १५ सेंटीमीटर लांबीची काडी यासाठी योग्य ठरेल. ही काडी एका ग्लासमध्ये पाणी घेऊन त्यात ठेवा. साधारण ७ ते १० दिवसांत काडीला छोटी पांढरी मुळे फुटायला सुरुवात होते. मुळे चांगली दिसू लागल्यानंतर ही काडी कुंडीतील मातीत लावा.
1 / 6
पुदिन्यासाठी कोणती कुंडी आणि माती वापरावी? - पुदिना झपाट्याने वाढणारे रोप आहे. त्यामुळे तो कुंडीत सहज वाढते. यासाठी ८ ते १२ इंच खोल कुंडी वापरू शकता. कुंडीच्या तळाला पाणी बाहेर जाण्यासाठी छिद्र असणे महत्त्वाचे आहे. कुंडीत पाणी साचून राहिल्यास पुदिन्याची मुळे खराब होऊ शकतात.
2 / 6
पुदिन्याला किती सूर्यप्रकाश द्यावा? - पुदिन्याला दिवसभर कडक उन्हात ठेवण्याची गरज नाही. दररोज साधारण ३ ते ६ तास सकाळचे हलके ऊन मिळाले तरी रोपाची चांगली वाढ होऊ शकते.
3 / 6
माती कोरडी वाटली तरच पाणी द्या - पुदिन्याच्या मातीत थोडा ओलावा असणे चांगले, मात्र कुंडीत पाणी साचू देऊ नका. वरची माती कोरडी वाटल्यानंतरच पाणी टाका. जास्त पाणी दिल्यास मुळे कुजण्याची शक्यता असते.
4 / 6
पुदिन्याचे रोप दाट आणि हिरवे ठेवण्यासाठी ही गोष्ट लक्षात ठेवा - पुदिन्याचे रोप जास्त दाट आणि हिरवे हवे असेल तर त्याच्या वरच्या नवीन कोंबांची वेळोवेळी हलकी छाटणी करा. रोपाला फुले येऊ लागली तर ती काढून टाका. त्यामुळे रोपाची ऊर्जा नवीन पाने आणि फांद्या वाढवण्यासाठी वापरली जाते.
5 / 6
घरच्या घरी उगवलेला पुदिना कशासाठी वापरता येईल?- घरच्या घरी उगवलेला ताजा पुदिना फक्त चटणीसाठीच नाही, तर रायता, सलाड, हर्बल चहा, चाट, पराठे, पक्वान्न आणि विविध स्नॅक्समध्ये वापरता येतो. त्यामुळे बाजारातून आणलेली पुदिन्याची काडी वापरल्यानंतर फेकून देण्याऐवजी तिच्यापासून रोप तयार करा. थोडी काळजी घेतली तर त्याच एका काडीपासून पुढे घरच्या कुंडीत ताजा आणि हिरवागार पुदिना मिळू शकतो.
