‘खाशाबा’ची चर्चा असताना नागराज मंजुळेंचा हा सिनेमा टॉप ट्रेंडिंगमध्ये; व्यक्तिमत्त्वाच्या अगदी विरुद्ध साकारली भूमिका
Nagraj Manjule : नागराज मंजुळे यांनी या चित्रपटात मुख्य भूमिका साकारली आहे. त्यांची ही भूमिका त्यांच्या खऱ्या व्यक्तिमत्त्वापेक्षा पूर्णपणे वेगळी आहे. यात त्यांच्यासोबत अमेय वाघसुद्धा मुख्य भूमिकेत आहे.
नागराज मंजुळे यांच्या 'खाशाबा' या चित्रपटाचा टीझर प्रदर्शित झाल्यापासून सोशल मीडियावर त्याची जोरदार चर्चा आहे. या चित्रपटाची प्रेक्षक उत्सुकतेने प्रतीक्षा करत आहेत. मात्र त्यादरम्यान ओटीटी प्लॅटफॉर्मवर नागराज मंजुळेंच्या दुसऱ्या एका चित्रपटाला प्रेक्षकांची खूप पसंती मिळतेय. या चित्रपटाने ओटीटीवर टॉप ट्रेंडिंगच्या यादीत स्थान मिळवलंय.
नागराज मंजुळे आणि अमेय वाघ यांच्या मुख्य भूमिका असलेल्या या चित्रपटाचं नाव 'फ्रेम' असं आहे. 10 जुलै 2026 रोजी हा चित्रपट झी5 या ओटीटी प्लॅटफॉर्मवर स्ट्रीम झाला. सध्या तो टॉप 10 ट्रेंडिंग चित्रपटांच्या यादीत चौथ्या क्रमाकांवर आहे. समाजातील गंभीर प्रश्नांवर भाष्य करणारा हा आशयघन चित्रपट आहे.
विक्रम पटवर्धन यांनी या चित्रपटाचं लेखन आणि दिग्दर्शन केलं आहे. यामध्ये नागराज मंजुळे आणि अमेय वाघ यांच्यासोबतच मुग्धा गोडसे आणि अक्षया गुरव यांच्याही भूमिका आहेत. 'फ्रेम' या नावावरूनच चित्रपटाचा विषय थोडाफार समजतो. फोटो जर्नलिझम या विषयाभोवती या चित्रपटाची कथा फिरते.
यात अनुभवी फोटोग्राफर चंदू पानसरे (नागराज मंजुळे) यांची व्यावसायिक कार्यशैली आणि नवोदित फोटोग्राफर सिद्धार्थ देशमुख (अमेय वाघ) याचा सहानुभूतीपूर्ण दृष्टीकोन यांच्यातला संघर्ष दाखवण्यात आला आहे. चंदू संकटाच्या काळात एखादा शॉट टिपण्यासाठी क्षण शोधायला आतुर असतो. त्याच्यासाठी शूटिंगला सर्वाधिक महत्त्व असतं. एक चांगला माणूस बनण्याऐवजी एक चांगला फोटोग्राफर बनणं तो पसंत करतो.
'फ्रेम' या चित्रपटाचा शेवट हादरवून सोडणारा आहे. हा चित्रपट पुन्हा एकदा ही गोष्ट अधोरेखित करतो की एक चांगला माणूस असणं ही केवळ एक निवड नसून ती अस्तित्वाची गरज आहे. यात नागराज मंजुळे यांनी साकारलेला चंदू हा अगदी त्याच्या विरुद्ध व्यक्तिमत्त्वाचा आहे.
