Raj Thackeray Family : कियानच्या पाठीवर आली छोटी बहीण; अमित-मितालींनी खास पोस्टद्वारे दिली गुड न्यूज
महाराष्ट्र नवनिर्माण सेनेचे अध्यक्ष राज ठाकरे यांच्या कुटुंबात सध्या आनंदाला उधाण आले आहे. 'शिवतीर्थ' बंगल्यावर एका लहानग्या पाहुणीचे आगमन झाले असून मनसे नेते अमित ठाकरे आणि त्यांच्या पत्नी मिताली ठाकरे हे दुसऱ्यांदा आई-बाबा झाले आहेत.
मिताली ठाकरे यांनी एका गोंडस मुलीला जन्म दिला असून, संपूर्ण ठाकरे कुटुंबीयांमध्ये उत्साहाचे वातावरण पसरले आहे. अमित आणि मिताली ठाकरे यांनी सोशल मीडियावर एक खास डिजिटल कार्ड शेअर करून या आनंदाच्या वृत्ताला अधिकृत दुजोरा दिला.
या पोस्टमध्ये त्यांचा मोठा मुलगा 'कियान' याला लहान बहीण आल्याचा गोड उल्लेख करण्यात आला आहे. तसेच '०७.०९.२०२६' ही या चिमुकल्या परीच्या जन्माची तारीख नमूद करण्यात आली आहे.
अमित ठाकरे आणि मिताली बोरुडे २७ जानेवारी २०१९ रोजी मोठ्या थाटामाटात विवाहबंधनात अडकले होते. या दाम्पत्याला आधी 'कियान' नावाचा मुलगा असून, आता त्याच्या पाठीवर छोट्या बहिणीचे आगमन झाले आहे. त्यामुळे राज ठाकरे हे दुसऱ्यांदा आजोबा बनले आहेत.
सोशल मीडियावर ही बातमी समोर येताच मनसे सैनिक, कार्यकर्ते तसेच राजकीय, सामाजिक अन् कला क्षेत्रातील दिग्गजांकडून ठाकरे कुटुंबावर अभिनंदनाचा आणि शुभेच्छांचा वर्षाव केला जात आहे. 'शिवतीर्थ'वर नव्या पाहुणीच्या आगमनाने एकच जल्लोष पाहायला मिळत आहे.
