कॅन्सर झाला, लवकर वर जाणार… टक्कल केल्यानंतर अफवांमुळे महेश मांजरेकरांकडे रडत गेली अभिनेत्री
सध्या मराठी इंडस्ट्रीमधील एक अभिनेत्री चर्चेत आहे. तिने नुकताच दिलेल्या एका मुलाखतीमध्ये भूमिकेसाठी टक्कल केल्यानंतरचा अनुभव सांगितला आहे.
मराठी चित्रपटसृष्टीमधील अतिशय लोकप्रिय अभिनेत्री सविता मालपेकर यांनी टक्कल केल्यामुळे प्रचंड चर्चेत होत्या. त्यानंतर त्यांच्या आयुष्याबाबत अनेक अफवा सुरु झाल्या होत्या. या अफवा ऐकल्यानंतर सविता यांना प्रचंड त्रास झाला होता. काहींनी तर अफवा पसरवली की, “सविताला कॅन्सर झाला आहे, आता ती लवकरच जग सोडणार.” या अफवांमुळे व्यथित झालेल्या सविता महेश मांजरेकर यांच्याकडे रडत गेल्या होत्या.
सविता मालपेकर यांनी महेश मांजरेकर यांच्या ‘काकस्पर्श’ चित्रपटात काम केले होते. या भूमिकेसाठी त्यांनी टक्कल केले होते. नुकत्याच दिलेल्या मुलाखतीत त्यांनी या अनुभवाबद्दल खुलासा केला.
सविता म्हणाल्या, “महेश सरांनी चित्रपटासाठी टक्कल करण्याची अट घातली. मी लगेच तयार झाले. अशा प्रकारची भूमिका करण्याची मी ३२ वर्षे वाट पाहत होते. टक्कल केल्यानंतर मी टोपी किंवा स्कार्फ काहीही वापरले नाही.”
टक्कल केल्यावर इंडस्ट्रीत वेगवेगळ्या अफवा पसरल्या. कोणाला वाटले की मला कॅन्सर झाला आहे आणि मी लवकरच जग सोडणार आहे, तर काहींनी अशी अफवा उडवली की, मी टक्कल करण्यासाठी महेश मांजरेकरांकडून खूप मोठी रक्कम मागितली होती. या अफवांमुळे सविता खूप दुखावल्या गेल्या आणि त्यांनी महेश मांजरेकर यांच्याकडे जाऊन रडत आपली व्यथा व्यक्त केली. मात्र महेश सरांनी त्यांना धीर दिला आणि अफवांकडे दुर्लक्ष करण्याचा सल्ला दिला.
सविता मालपेकर यांनी स्पष्ट केले की, “मी कधीही पैशांसाठी हट्ट धरत नाही किंवा निर्मात्यांकडून जास्त पैसे मागत नाही. प्रेक्षकांचे प्रेम आणि आई-वडिलांच्या पुण्याईमुळे आज मी इथपर्यंत पोहोचले आहे.” या मुलाखतीत त्यांनी आपल्या मेहनतीवर आणि प्रामाणिकपणावर भर दिला.
