Shreyas Iyer : न्यूझीलंडला हरवल्यानंतर श्रेयस अय्यरने 3 खेळाडूंना दिले विजयाचे श्रेय; सामन्यानंतर तोंडभरून कौतुक
न्यूझीलंडविरुद्ध 226 धावांचा विक्रमी पाठलाग करताना भारतीय संघाने शानदार विजय मिळवला. सामन्यानंतर कर्णधार श्रेयस अय्यरने 3 खेळाडूंच्या कामगिरीचे विशेष कौतुक केले. संजू सॅमसन, अभिषेक शर्मा आणि नमन धीर यांच्याबद्दल तो नेमकं काय म्हणाला?
भारताने न्यूझीलंडविरुद्धच्या पहिल्या टी-२० सामन्यात 226 धावांचे लक्ष्य यशस्वीरीत्या पार करत 4 विकेट्सने विजय मिळवला. या विजयासह भारताने 5 सामन्यांच्या मालिकेत 1-0 अशी आघाडी घेतली. यावेळी त्याने श्रेयस अय्यरने संजू सॅमसन आणि अभिषेक शर्मा यांच्या आक्रमक फलंदाजीचे कौतुक केले. 220 हून अधिक धावांचा पाठलाग करताना पॉवरप्लेमध्ये 80 ते 85 धावा होणे ही अप्रतिम सुरुवात असल्याचे तो म्हणाला.
कर्णधार श्रेयस अय्यरने संजू सॅमसनच्या आक्रमक फलंदाजीचे कौतुक केले. संजूने 33 चेंडूंत 67 धावा करत भारताच्या विजयाचा पाया रचला. संजू सॅमसन आणि अभिषेक शर्मा हे आंतरराष्ट्रीय स्तरावरील अनुभवी खेळाडू आहेत. त्यांना आपली भूमिका चांगली माहीत असून, ही जोडी फॉर्ममध्ये असताना संपूर्ण सामन्याचा पाया रचते, असे श्रेयसने सांगितले.
प्रत्येक सामन्यात अशी आक्रमक सुरुवात मिळत नाही, असेही श्रेयसने स्पष्ट केले. मात्र, या दोघांनी मोठी खेळी केल्यास उर्वरित फलंदाजांना डाव सावरून सामना संपवण्याची जबाबदारी पार पाडता येते.
अखेरच्या षटकांमध्ये दबाव असतानाही नमन धीरने दाखवलेल्या संयमाचे श्रेयसने कौतुक केले. सातव्या क्रमांकावर फलंदाजी करताना त्याने शांतपणे खेळ करत भारताच्या विजयात महत्त्वाची भूमिका बजावली.
नमन धीर हा फलंदाजीसोबतच गोलंदाजीतही उपयुक्त पर्याय असल्याचे श्रेयसने सांगितले. या सामन्यात त्याने दाखवलेला शांत स्वभाव आणि संयम वाखाणण्याजोगा होता, असेही त्याने नमूद केले.
