Homemade Garlic Coconut Chutney : फक्त 5 टिप्स अन् झणझणीत लसूण- खोबऱ्याची चटणी; पती एकदा खाईल तर खातच राहिल
ज्वारीची भाकरी, झुणका किंवा पिठल्यासोबत लसूण-खोबऱ्याची चटणी अप्रतिम लागते. फक्त 5 सोप्या टिप्स लक्षात ठेवा आणि वाढवा जेवणाची चव.
लसूण, खोबरे आणि लाल मिरची यांचा खमंग सुगंध आला कि तोंडाला पाणी सुटतं. ज्वारीची भाकरी, पिठलं, झुणका किंवा वरण भातासोबत लसूण- खोबऱ्याची चटणी असेल तर साधं जेवणसु्द्धा चविष्ट लागतं. चला घरच्या घरी झटपट तयार होणारी झणझणीत चटणी बनवूया
साहित्य : सुकं खोबरं ( बारीक किसलेलं किंवा बारीक तुकडे केलेलं ), लसूण - 12 -15 पाकळ्या, सुकी लाल मिरची 5 ते 8, जिरे, तीळ, मीठ, तेल
खोबरे भाजून घ्या : कढई गरम करून त्यात सुके खोबरे घाला. मंद आचेवर सतत हलवत सोनेरी रंग येईपर्यंत भाजा. खोबरे जळू देऊ नका, नाहीतर चटणीला कडवट चव येऊ शकते.
लसूण आणि मिरची भाजा :त्यात कढईत थोडे तेल घाला.लसणाच्या पाकळ्या आणि सुकी लाल मिरची मंद आचेवर हलकी भाजून घ्या. लसूण छान भाजला की चटणीला खमंग चव येते. आवडत असल्यास जिरे आणि तीळही भाजून त्यात टाका.
सर्व साहित्य वाटून घ्या :भाजलेले खोबरे, लसूण,लाल मिरची,जिरे,तीळ आणि मीठ खलबत्यात वाटून घ्या. चटणी बारीक किंवा थोडी जाडसर, जशी हवी तशी वाटून घ्या.शक्यतो पाणी घालू नका. पाणी घातलत तर चटणी जास्त काळ टिकणार नाही.
चटणी तयार :तयार चटणी एका स्वच्छ, कोरड्या डब्यात काढा.ज्वारी,बाजरीची भाकरी,पिठलं,झुणका, थालीपीठ किंवा वरण - भातासोबत वाढा.
