आदिवासी कार्य करणाऱ्या वैभव सोनोनेचा लंडनमध्ये सन्मान, भारत-यूके अचिव्हर्स ऑनर्स पुरस्काराने सन्मानित
28 फेब्रुवारी रोजी या सन्मानाची घोषणा इंग्लंडच्या संसदेत करण्यात आली. वैभव आणि त्याची अर्धांगिनी स्नेहल या दोघांनी मध्य प्रदेशातील मंडला जिल्ह्यातील धमनपाणी या अति दुर्गम आदिवासी भागात, आदिवासी महिलांच्या उत्थानासाठी कार्य केलंय.
वाशिमच्या रिसोड तालुक्यातील पेड़गावच्या वैभव सोनोने यांना ब्रिटिश कौंसिल, व्यापार-व्यवसाय विभाग ब्रिटिश सरकार आणि यूके राष्ट्रीय विद्यार्थी संघटना (NISAU) यांच्या संयुक्त विद्यमाने आयोजित एका समारंभात 28 फेब्रुवारीला लंडन येथे भारत-यूके अचिव्हर्स ऑनर्स (India-UK Achievers Honours) हा सन्मान देण्यात आला.
28 फेब्रुवारी रोजी या सन्मानाची घोषणा इंग्लंडच्या संसदेत करण्यात आली. वैभव आणि त्याची अर्धांगिनी स्नेहल या दोघांनी मध्य प्रदेशातील मंडला जिल्ह्यातील धमनपाणी या अति दुर्गम आदिवासी भागात, आदिवासी महिलांच्या उत्थानासाठी कार्य केलंय.
वैभव सध्या यूकेमधील लीड्स विद्यापिठात पर्यावरण आणि विकास या विषयात एमएससी शिकत आहे. या शिक्षणासाठी मागच्यावर्षी वैभवला ब्रिटिश सरकारच्या कॉमनवेल्थ शेअर्ड आणि चेवनिंग अशा दोन्ही स्कॉलरशिप जाहिर झाल्या होत्या.
त्यापैकी कॉमनवेल्थ शेअर्ड ही स्कॉलरशिप वैभवने निवडली असून. यूकेमध्ये शिकत असतांना अभ्यासासोबतच अनेक महत्वाच्या गोष्टीमध्ये वैभवने आपली छाप उमटवली आहे.
तो सध्या त्याच्या विषयाचा विद्यार्थी प्रतिनिधी म्हणून काम पाहत आहे. फेब्रुवारीच्या पहिल्या आठवड्यात झालेल्या ‘राष्ट्रीय विद्यार्थी संघ’ डेलीगेट्सच्या निवडणुकीत वैभवने विजय मिळवला असुन आता तो यूकेमध्ये राष्ट्रीय स्तरावर लीड्स विद्यापीठाचे प्रतिनिधित्व करेल.
यूकेमधून शिक्षण पूर्ण केल्यानंतर मध्य प्रदेशातील आदिवासी क्षेत्रात आदिवासी समुदाय-शेतकरी आणि महिला यांच्या संबंधित पर्यावरण आणि नैसर्गिक साधन संपत्तीच्या प्रश्नांवर काम करायचा निर्णय वैभव याने घेतला आहे.
