‘यापेक्षा प्रेमात पडणं खूप सोपं..’, वनिता खरात वर्कआउट करताना पडली, Video व्हायरल
‘यापेक्षा प्रेमात पडणं जास्त सोपं आहे’; महाराष्ट्राची हास्यजत्रा फेम अभिनेत्री वनिता खरातचा वर्कआऊट व्हिडीओ तुफान व्हायरल. चाहत्यांकडून कौतुकाचा वर्षाव.
टीव्हीवरील लोकप्रिय विनोदी कार्यक्रम ‘महाराष्ट्राची हास्यजत्रा’ गेल्या अनेक वर्षांपासून प्रेक्षकांचे भरभरून मनोरंजन करत आहे. या कार्यक्रमातील प्रत्येक कलाकाराने आपल्या भन्नाट विनोदशैलीने आणि दमदार अभिनयाने घराघरात वेगळी ओळख निर्माण केली आहे.
यामधील अभिनेत्री वनिता खरात ही सोशल मीडियावर नेहमी चर्चेत असते. अनेकदा ती तिचे फोटो आणि मजेशीर व्हिडीओ शेअर करत असते. अशातच तिने तिच्या इन्स्टाग्रामवर वर्कआऊट करतानाचा व्हिडीओ शेअर केला आहे.
वनिता खरात गेल्या काही महिन्यांपासून वजन कमी करण्यासाठी सातत्याने प्रयत्न करत आहे. नियमित व्यायाम, फिटनेस ट्रेनिंग आणि निरोगी जीवनशैलीचा स्वीकार करत ती आपल्या फिटनेस जर्नीबाबत चाहत्यांना अपडेट देत असते.
व्यायाम करतानाचे फोटो आणि व्हिडीओ ती वेळोवेळी सोशल मीडियावर शेअर करत असल्याने तिच्या मेहनतीचे अनेकजण कौतुक करताना दिसतात. नुकत्याच शेअर केलेल्या एका व्हिडीओमध्ये वनिता एका अवघड व्यायामाचा सराव करताना दिसते.
मात्र हा व्यायाम करण्याच्या प्रयत्नात तिचा तोल जातो आणि ती खाली पडते. हा प्रसंग तिने अतिशय सकारात्मक आणि विनोदी पद्धतीने चाहत्यांसमोर मांडला आहे. हा व्हिडीओ पोस्ट करताना वनिताने नेहमीप्रमाणेच आपल्या विनोदी शैलीत कॅप्शन लिहिले. तिने म्हटले, “यापेक्षा प्रेमात पडणं जास्त सोपं आहे.”
