खरचटायचं सोडाच, भाजपनं ठरवलं तर रक्तबंबाळ व्हाल; प्रवीण दरेकरांचा राऊतांना इशारा

मुंबई : शिवसेना खासदार संजय राऊत यांना माध्यमांशी बोलल्याशिवाय चैन पडत नाही. आम्ही ऑपरेशन लोटसबाबत काहीच बोललो नाही. पण भाजपनं ठरवलं तर खरचटायचं सोडा, रक्तबंबाळ व्हाल, असा इशारा भाजप नेते प्रवीण दरेकर यांनी दिला. (Pravin Darekar on Sanjay Raut)

“किरीट सोमय्या हे माजी खासदार आहेत. त्यांच्या बोलण्याला त्यांचा पक्षही गांभीर्याने घेत नाही. त्यामुळे त्यांनी खोटेनाटे आरोप करणं थांबवावं, असं सांगतानाच जुनी थडगी आम्हालाही उकरता येतात. पण मागचं विसरुन पुढे जावं ही आमची भूमिका असते. आम्हीही जुनी थडगी उकरली तर तुमच्या पापाचे सांगाडेच सापडतील,” असा इशारा शिवसेना नेते संजय राऊत यांनी दिला होता. यावर दरेकरांनी प्रतिक्रिया दिली.

“महाविकासआघाडीचं सरकार आम्ही एक वर्ष चालवलं आहे, असे मघाशी संजय राऊत म्हणाले. राऊतांना माध्यमांशी बोलल्याशिवाय चैन पडत नाही. पण गेल्या वर्षात तुम्ही काय केलं?” असा सवालही दरेकरांनी उपस्थित केला आहे.

“आजही तुम्ही कोव्हिड कंट्रोल करु शकत नाही. सगळं राज्य विस्कळीत आहे. ते स्वत:च भीतीने ग्रासले आहेत. त्यामुळे सारखं सावलीसारखं भिऊन सरकार पाडून दाखवा, असं आव्हान कोणीही देत नाहीत. तरीही ते बोलतात,” असेही प्रवीण दरेकर म्हणाले.

“ऑपरेशन लोटस बाबत आम्ही काहीच बोललो नाहीत. भाजपनं ठरवलं तर तुम्ही रक्तबंबाळ व्हाल, खरचटायचं सोडाच. बोलायला फक्त संजय राऊतांनाच येत नाही. उद्या सगळ्यांनी तोंड उघडलं तर थडगी काय आणि दुसरं काय हे सगळं समजेल. त्यामुळे कोणी कोणाला आव्हान देऊ नये आणि आव्हानाच्या भाषा करुच नयेत,” असा टोलाही प्रवीण दरकेरांना लगावला. (Pravin Darekar on Sanjay Raut)

संबंधित बातम्या : 

जुनी थडगी उकरली तर तुमच्याच पापाचे सांगाडे दिसतील; राऊतांचा किरीट सोमय्यांना इशारा

अर्थव्यवस्थेला ‘बूस्टर डोस देण्यासाठी ‘प्रोत्साहन पॅकेज’ जाहीर, किती ‘प्रोत्साहन’ मिळते ते भविष्यात दिसेलच, शिवसेनेचा टोला