दिल्लीच्या मुख्यमंत्र्यांविरोधात 65 जणांचा शड्डू, अरविंद केजरीवालांची संपत्ती…

नवी दिल्ली : दिल्लीचे मुख्यमंत्री अरविंद केजरीवाल यांच्या संपत्तीत गेल्या पाच वर्षात दीडपटीने वाढ झाली आहे. केजरीवाल यांनी काल (मंगळवारी) नवी दिल्ली विधानसभा मतदारसंघातून उमेदवारी अर्ज दाखल केला. केजरीवालांविरोधात तब्बल 65 जणांनी शड्डू ठोकला आहे. निवडणूक प्रतिज्ञापत्रात केजरीवालांनी आपल्याकडे 3.40 कोटींची संपत्ती (Arvind Kejriwal Property) असल्याचा उल्लेख केला आहे.

2015 मध्ये अरविंद केजरीवाल यांनी आपली संपत्ती 2.10 कोटी रुपये असल्याचं नमूद केलं होतं. गेल्या पाच वर्षांच्या कालावधीत संपत्तीत 50 टक्क्यांनी म्हणजे 1.03 कोटींनी वाढ झाली आहे. अरविंद केजरीवालांकडे 9.65 लाख रुपयांची रोकड आणि मुदत ठेवी आहेत.

केजरीवाल यांच्या स्थावर मालमत्तेत 2015 पासून कोणतीही वाढ झालेली नाही. त्यांची स्थावर मालमत्ता 1.92 कोटी रुपये इतकी आहे. त्यांची पत्नी सुनिता केजरीवाल यांच्या नावे एक कोटींची संपत्ती आहे. सुनिता यांच्याकडे 57 लाखांची रोकड आहे. मिसेस केजरीवालांनी सरकारी नोकरीतून व्हीआरएस घेतल्यानंतर त्यांना 32 लाख रुपये मिळाले होते.

केजरीवालांविरोधात 65 उमेदवार

नवी दिल्ली विधानसभा मतदारसंघातून अरविंद केजरीवाल यांच्याविरोधात 65 जणांनी उमेदवारी अर्ज दाखल केला आहे. यापैकी बहुतांश अपक्ष उमेदवार आहेत. भाजपकडून सुनील यादव, तर काँग्रेसकडून रोमेश सभरवाल निवडणूक लढवणार आहेत.

अरविंद केजरीवाल यांना शेवटच्या दिवशी उमेदवारी अर्ज भरण्यासाठी सहा तास वाट पाहावी लागली होती. केजरीवाल अर्ज भरण्यासाठी सहकुटुंब दाखल झाले, तेव्हा त्यांना 45 नंबरचं टोकन देण्यात आल होतं. अखेर संध्याकाळी साडेसहा वाजता त्यांचा नंबर लागला होता.

केजरीवाल सोमवारीही निवडणूक अर्ज भरण्यासाठी निघाले होते. परंतु रोड शोमध्ये तूफान गर्दी असल्यामुळे ते जामनगर हाऊसपर्यंत पोहचू शकले नव्हते. अखेर मंगळवारी केजरीवालांनी निवडणूक अर्ज दाखल केला.

स्थानिक टीव्ही वाहिनी ‘पृथ्वी दर्शन’चे मालिक योगी माथुरही केजरीवालांविरोधात अपक्ष निवडणूक लढवणार आहेत. ‘केजरीवाल दुसऱ्यांदा मुख्यमंत्री होण्यास अपात्र आहेत, राजकीय नेत्याने काय करायला हवं, हे आपण दाखवून देणार’ असल्याचं माथुर म्हणाले.

याशिवाय वकील, शिक्षकही केजरीवालांविरोधात निवडणूक लढवत आहेत. 50 पेक्षा जास्त उमेदवार अपक्ष म्हणून रिंगणात आहेत किंवा त्यांच्या पक्षाला अधिकृत मान्यता नाही.

Arvind Kejriwal Property