एकनाथ शिंदे मुख्यमंत्री असणार, पुढच्यावेळी…गुलाबराव पाटलांच्या विधानाने राजकीय वर्तुळात खळबळ, भर भाषणात सांगितली डेडलाईन!

दसऱ्यानिमित्त गोरेगाव येथील नेस्को सेंटरमध्ये उपमुख्यमंत्री एकनाथ शिंदे यांच्या शिवसेनेचा दसरा मेळावा पार पडत आहे. या मेळाव्यात राज्याचे मंत्री गुलाबराव पाटील यांनी एकनाथ शिंदे यांच्या नेतृत्वावर विश्वास व्यक्त करत पुढील वेळी याच ठिकाणी भाषणासाठी येईन, तेव्हा एकनाथ शिंदे मुख्यमंत्री असतील, असा विश्वास व्यक्त केला. त्यांच्या या विधानामुळे मेळाव्यातील राजकीय चर्चेला रंग चढला आहे.

गुलाबराव पाटील यांनी आपल्या भाषणात एकनाथ शिंदे यांचे नेतृत्व आणि शिवसेनेच्या कार्याचा उल्लेख केला. ‘एकनाथ शिंदे साहेबांना जो आडवा येईल, त्याचा सत्यानाश होवो’ असे वक्तव्य त्यांनी केले. तसेच, ज्याप्रमाणे रामसेतू तयार झाला, त्याप्रमाणे आमच्या नेत्याने लोकांना जोडण्याचे काम केले असे म्हणत त्यांनी एकनाथ शिंदे यांच्या नेतृत्वाचे कौतुक केले.

‘भगवा आमच्या खांद्यावर आणि शिवसैनिक शेतकऱ्यांच्या बांधावर’ हे वाक्य आपल्याला विशेष आवडल्याचेही पाटील यांनी सांगितले. शिवसैनिकांनी शेतकऱ्यांच्या प्रश्नांसाठी प्रत्यक्ष बांधावर जाऊन काम करण्याची भूमिका यावेळी अधोरेखित करण्यात आली.

‘शिंदे साहेब देणारे आहेत, घेणारे नाहीत’

भाषणादरम्यान गुलाबराव पाटील यांनी विरोधकांवरही निशाणा साधला. बांगलादेशी नागरिकांची बाजू घेत असल्याचे आरोप आणि 500 कोटी रुपये घेतल्याचे आरोप खोटे असल्याचे ते म्हणाले. तसेच, पक्षाला अडचणीत आणण्याचा प्रयत्न करणाऱ्यांवर टीका करताना, ‘आमचे शिंदे साहेब हे देणारे आहेत, घेणारे नाहीत’ असे विधान त्यांनी केले.

जलसंधारणाच्या कामांवर भर देण्याचे आवाहन

गुलाबराव पाटील यांनी आपल्या पक्षातील सर्व आमदार आणि खासदारांना जलसंधारणाच्या कामांवर भर देण्याचे आवाहन केले. जलसंधारणासाठी उपलब्ध निधीपैकी 50 टक्के रक्कम खर्च केली पाहिजे, अशी भूमिका त्यांनी मांडली. तसेच, आपल्या मतदारसंघातील नाले खोल करण्याचे काम हाती घेणार असल्याचेही त्यांनी सांगितले.

शिंदे पुन्हा मुख्यमंत्री व्हावेत, अशी देवीचरणी प्रार्थना

भाषणाच्या शेवटी गुलाबराव पाटील यांनी देवीच्या चरणी प्रार्थना करत एकनाथ शिंदे पुन्हा मुख्यमंत्री व्हावेत आणि राज्यातील शेतकरी सुखी व्हावेत अशी इच्छा व्यक्त केली. दसरा मेळाव्यातील या भाषणातील त्यांच्या विधानांमुळे मेळाव्यातील राजकीय वातावरण अधिक चर्चेत आले आहे.