IPL 2026 : गुजरात टायटन्स की राजस्थान रॉयल्स! कोणाचं पारडं जड? वाचा हेड टू हेड आकडेवारी

आयपीएल 2026 स्पर्धा आता प्रत्येक सामन्यानंतर पुढे सरकत आहे. या स्पर्धेतील नववा सामना गुजरात टायटन्स आणि राजस्थान रॉयल्स यांच्यात होत आहे. राजस्थान रॉयल्सने पहिल्या सामन्यात चेन्नई सुपर किंग्सचा पराभव केला होता. तर गुजरात टायटन्सला पंजाब किंग्सकडून पराभवाचं तोंड पाहावं लागलं होतं. त्यामुळे हा सामना गुजरात टायटन्ससाठी खूपच महत्त्वाचा आहे. कारण या सामन्यात विजय मिळवला तर टॉप 4 मध्ये आशा पल्लवीत होत जातील. अन्यथा विजयाचं दडपण वाढत जाईल. हा सामना गुजरात टायटन्सचं होमग्राउंड असलेल्या नरेंद्र मोदी स्टेडियममध्ये होणार आहे. हा सामना 4 एप्रिल रोजी संध्याकाळी 7.30 वाजता होणार आहे. तशी हेड टू हेड आकडेवारी पाहिली तर गुजरात टायटन्सचं पारडं जड आहे. पण राजस्थानचा संघ नव्याने बांधला असून खेळाडू फॉर्मात आहेत. त्यामुळे गुजरात टायटन्सपुढे आव्हान असणार आहे.

गुजरात टायटन्स आणि राजस्थान रॉयल्स हेड टू हेड

आयपीएल स्पर्धेत गुजरात टायटन्स आणि राजस्थान रॉयल्स हे संघ 8 वेळा आमनेसामने आले आहेत. यात गुजरात टायटन्सचं पारडं जड आहे. गुजरातने 6 वेळा राजस्थानला मात दिली आहे. तर राजस्थान रॉयल्सचा संघ 2 वेळा विजय मिळवण्यात यशस्वी ठरला आहे. गुजरात टायटन्सने राजस्थानविरुद्ध सर्वाधिक 217 धावा केल्या आहेत. तर राजस्थान रॉयल्सने सर्वाधिक 212 धावा केल्या आहेत. तर गुजरात टायटन्सचा सर्वात कमी स्कोअर हा 119, राज्स्थान सर्वात कमी स्कोअर हा 118 आहे.

नाणेफेकीचा कौल कोणाच्या बाजूने?

राजस्थान रॉयल्सचा संघ हा नाणेफेकीत लकी ठरला आहे. राजस्थान रॉयल्सने 6 वेळा नाणेफेकीचा कौल जिंकला आहे. तर गुजरात टायटन्स फक्त दोनदा नाणेफेक जिंकली आहे. गुजरात टायटन्सने दोन वेळा नाणेफेक जिंकली आणि दोन्ही वेळेस क्षेत्ररक्षण निवडली. या दोन्ही सामन्यात गुजरात टायटन्सने विजय मिळवला. दुसरीकडे, राजस्थानने 6 वेळा नाणेफेक जिंकल्यानंतर दोन वेळा फलंदाजी आणि 4 वेळा क्षेत्ररक्षण निवडलं होतं. यात फक्त दोन सामने जिंकले आहेत. नाणेफेकीचा कौल जिंकल्यानंतर प्रथम गोलंदाजी करण्यासाठी प्राधान्य दिलं जाईल.