KKR vs SRH : कोलकाता आणि हैदराबादपैकी वरचढ कोण? आकडे कुणाच्या बाजूने?
Kolkata Knight Riders vs Sunrisers Hyderabad Head To Head Record : आयपीएल स्पर्धेतील 19 व्या हंगामातील पाचव्या सामन्यात 2 एप्रिलला कोलकाता नाईट रायडर्स विरुद्ध सनरायजर्स हैदराबाद आमनेसामने असणार आहेत. या सामन्यानिमित्ताने दोन्ही संघांपैकी कोण वरचढ आहे? हे जाणून घेऊयात.
आयपीएल स्पर्धेतील 19 व्या हंगामातील पाचव्या सामन्यात 2 एप्रिलला कोलकाता नाईट रायडर्स विरुद्ध सनरायजर्स हैदराबाद आमनेसामने असणार आहेत. दोन्ही संघांचा हा या मोसमातील दुसरा सामना असणार आहे. केकेआर आणि हैदराबाद दोन्ही संघ या 19 व्या मोसमात ड्रीम सुरुवात करण्यात अपयशी ठरले. दोन्ही संघांना आपल्या सलामीच्या सामन्यात 200 पेक्षा अधिक धावा करुनही पराभूत व्हावं लागलं. आरसीबीने हैदराबादवर 6 विकेट्सने विजय मिळवला. मुंबईनेही अशाच अंदाजात विजय साकारला.
केकेआर-हैदराबादपैकी वरचढ कोण?
आता गुरुवारी 2 एप्रिल रोजी कोलकाता नाईट रायडर्स विरुद्ध सनरायजर्स हैदराबाद आमनेसामने असणार आहेत. दोन्ही संघांचा या सामन्यात विजयाचं खातं उघडून कमबॅक करण्याचा प्रयत्न असणार आहे. उभयसंघातील हा एकूण 31 वा सामना असणार आहे. या सामन्यानिमित्ताने दोन्ही संघांपैकी कोण वरचढ आहे? हे जाणून घेऊयात. कोलकाता नाईट रायडर्सने याआधी उभयसंघात झालेल्या 30 पैकी सर्वाधिक सामने जिंकले आहेत. केकेआरने हैदराबादला 30 पैकी 20 सामन्यांमध्ये पराभवाची धुळ चारली आहे. तर हैदराबादला कोलकाता नाईट रायडर्स विरुद्ध 10 सामने जिंकण्यात यश आलं आहे.
18 व्या मोसमातील कामगिरी
कोलकाता नाईट रायडर्स विरुद्ध सनरायजर्स हैदराबाद याच्यांत गेल्या मोसमात एकूण 2 सामने खेळवण्यात आले आहेत. केकेआरने यापैकी 1 सामना जिंकला होता. तर 1 सामना सनरायजर्स हैदराबादने आपल्या नावावर केला होता.
केकेआरची घरच्या मैदानात हैदराबाद विरुद्ध कामगिरी कशी?
केकेआर विरुद्ध एसआरएच यांच्यातील सामन्याला संध्याकाळी 7 वाजून 30 मिनिटांनी सुरुवात होणार आहे. उभयसंघातील सामना केकेआरच्या होम ग्राउंडमध्ये आयोजित करण्यात आला आहे. इडन गार्डन्समध्ये यंदाच्या मोसमातील हा केकेआरचा पहिलाच होम गेम असणार आहे. त्यामुळे चाहते मोठ्या संख्येने उपस्थित असणार आहेत. केकेआरची घरच्या मैदानात कामगिरी कशी राहिली आहे, हे आपण जाणून घेऊयात.
केकेआर घरच्या मैदानातही सरस
कोलकाता विरुद्ध हैदराबाद यांच्यात इडन गार्डन्समध्ये एकूण 11 सामने खेळवण्यात आले आहेत. केकेआरने या 11 पैकी 8 सामन्यांमध्ये विजय मिळवला आहे. तर हैदराबादला फक्त 3 सामन्यांमध्येच कोलकाता विरुद्ध विजय मिळवण्यात यश आलं आहे. हैदराबादने इडन गार्डन्समध्ये 2023 साली शेवटचा सामना जिंकला होता. त्यानंतर आता हैदराबाद जिंकणार का? हे निकालानंतरच स्पष्ट होईल.
