PBKS vs RR, Head to Head: राजस्थान विरुद्ध पंजाब लढतीत कोण कोणावर भारी?, असा आहे आतापर्यंतचा इतिहास
आज पंजाब किंग्स (Punjab Kings) आणि राजस्थान रॉयल्स (Rajasthan Royals) हे दोन्ही संघ मैदानात आमने-सामने असतील. पहिल्या पर्वात दोघांमधील सामना अत्यंत उत्कंठावर्धक झाला होता. पंजाबने 4 धावांनी विजय मिळवला होता.
मुंबई: आयपीएलच्या (IPL 2021) स्पर्धेत आज (21 सप्टेंबर) राजस्थान रॉयल्स (Rajasthan Royals) आणि पंजाब किंग्स (Punjab Kings) हे संघ एकमेंकाशी भिडणार आहेत. दोघेही उर्वरीत पर्वाची सुरुवात आजच्या सामन्याने करणार आहेत. यंदाच्या पर्वात आतापर्यंत दोन्ही संघाची अवस्था जवळपास समान आहे. दोन्ही संघ आणि त्यांचे कर्णधार चांगली कामगिरी करत असले तरी ते आपल्या संघाला टॉप 4 मध्ये घेऊन जाऊ शकलेले नाहीत. पंजाब किंग्सने 8 पैकी 3 सामने जिंकत सातवं स्थान पटकावलं आहे. तर राजस्थान रॉयल्सने 7 पैकी 3 सामने जिंकत सहावं स्थान पटकावलं आहे.
आज दोन्ही संघाच्या फलंदाजीचा विचार करता राजस्थान त्यांचे महत्त्वाचे खेळाडू बेन स्टोक्स, जोस बटलर यांच्या अनुपस्थितीने तणावात आहे. पण त्यांच्या जागी धुरंदर असे एविन लुईस आणि लियाम लिविंगस्टोन हे संघात आले आहेत. तर पंजाबकडे ताकदवर ख्रिस गेल आणि कर्णधार केएल राहुल यांची ताकद आहे.
इंग्लंडचा फिरकीपटू पंजाब किंग्समध्ये
पंजाबच्या संघाने इंग्लंडच्या आदिल रशीद (Adil Rashid) याला विकत घेतले आहे. त्यांनी ऑस्ट्रेलियाचा वेगवान गोलंदाज झाए रिचर्डसन (Jhye Richardson) याच्याजागी रशीदला संधी दिली आहे. रिचर्डसनने उर्वरीत आयपीएलमधून माघार घेतल्याने पंजाबने हा निर्णय घेतला आहे. आदिलसह संघात ऑस्ट्रेलियाचा युवा खेळाडू नाथन एलिस याला संधी देण्यात आली आहे. रिले मेरडिथच्या जागी नाथन खेळेल.
जगातील नंबर 1 टी-20 बोलर राजस्थान रॉयल्समध्ये
राजस्थान रॉयल्स (Rajasthan Royals) संघाने जगातील नंबर 1 टी-20 गोलंदाजाला संघात समाविष्ट केलं आहे. हा खेळाडू म्हणजे दक्षिण आफ्रिका संघाचा तबरेज शम्सी (Tabraiz Shamsi). आयपीएलच्या (IPL 2021) उर्वरीत पर्वात तबरेज शम्सी हा राजस्थानचा वेगवान गोलंदाज अँड्रयू टायच्या (Andrew Tye) जागी खेळताना दिसणार आहे. टायने उर्वरीत आयपीएलमधून कोरोनाच्या कारणामुळे माघार घेतली आहे. राजस्थानचा मुख्य गोलंदाज जोफ्रा आर्चरही दुखापतीमुळे स्पर्धेबाहेर गेल्याने त्याच्या जागी ग्लेन फिलीप्सला संधी देण्यात आली आहे.
Head To Head रेकॉर्ड
दोन्ही संघ आतापर्यंत 22 वेळा आयपीएलच्या इतिहासात आमने-सामने आले आहेत. यातील 12 वेळा राजस्थान रॉयल्सने विजय मिळवला आहे. तर 10 वेळा पंजाबच्या संघाने बाजी मारली आहे. मागील पाच सामन्यांचा विचार करता तीन वेळा पंजाबने विजय मिळवला आहे. त्यामुळे दोन्ही संघाचा इतिहास एकमेंकाना तोडीस तोड आहे. त्यामुळे आजचा सामना चुरशीचा होणार हे नक्की.
आजच्या सामन्यात दोन्ही संघाचे संभाव्य 11
राजस्थान रॉयल्स- संजू सॅमसन (कर्णधार/यष्टीरक्षक), एविन लुईस, यशस्वी जैसवाल, डेविड मिलर, शिवम दुबे, राहुल तेवतिया, श्रेयस गोपाल, जयदेव उनाडकट, तबरेज शम्सी, चेतन सकारीया.
पंजाब किंग्ज- केएल राहुल (कर्णधार/यष्टीरक्षक), मयांक अगरवाल, ख्रिस गेल, निकोलस पुरन, दीपक हुडा, शाहरुख खान, ख्रिस जॉर्डन, आदिल रशिद, मोहम्मद शमी, रवी बिश्नोई, अर्शदीप सिंग.
हे ही वाचा :
IPL 2021: केकेआरचा डॅशिंग विजय, 9 विकेट्सनी सामना घातला खिशात
(Know Head to head of todays match RR vs PBKS Know probable playing 11 for Todays IPL Match)
