पृथ्वी शॉच्या कारकिर्दीला नवं वळण! थेट कर्णधारपदाची धुरा हाती सोपवली; आता नेतृत्वाची कसोटी सुरू

फलंदाज पृथ्वी शॉच्या कारकिर्दीला एक मोठे वळण मिळाले आहे. देशांतर्गत क्रिकेटमध्ये महाराष्ट्राकडून खेळणाऱ्या पृथ्वी शॉची आगामी रणजी ट्रॉफीच्या पहिल्या सामन्यासाठी महाराष्ट्र वरिष्ठ पुरुष संघाच्या कर्णधारपदी नियुक्ती करण्यात आली आहे. महाराष्ट्र संघ ११ तारखेला दिल्लीतील पालम ‘अ’ स्टेडियमवर सर्व्हिसेसविरुद्ध आपल्या मोहिमेची सुरुवात करणार आहे. महाराष्ट्राचा कर्णधार ऋतुराज गायकवाड या पहिल्या सामन्यासाठी उपलब्ध नसेल.

मिळालेल्या माहितीनुसार, ६, ९ आणि ११ ऑक्टोबर रोजी पुदुचेरी येथे ऑस्ट्रेलिया ‘अ’ संघाविरुद्ध खेळल्या जाणाऱ्या तीन सामन्यांच्या अनधिकृत एकदिवसीय मालिकेसाठी ऋतुराजची भारत ‘अ’ संघाच्या कर्णधारपदी नियुक्ती करण्यात आली आहे. ११ ऑक्टोबरच्या सामन्यामुळे गायकवाड रणजी ट्रॉफीच्या पहिल्या फेरीत सहभागी होऊ शकणार नाही. युवा अष्टपैलू खेळाडू अर्शिन कुलकर्णी देखील भारत ‘अ’ संघात असल्यामुळे सर्व्हिसेसविरुद्धचा पहिला सामना खेळू शकणार नाही. त्यामुळे पृथ्वी शॉला ही महत्त्वाची संधी मिळाली आहे.

२०२५-२६ च्या देशांतर्गत हंगामापूर्वी पृथ्वी शॉ महाराष्ट्र संघात सामील होण्यासाठी मुंबई सोडून गेला. त्याने आपल्या पदार्पणाच्या हंगामात फलंदाजीने चांगली छाप पाडली. त्याने सात सामन्यांमध्ये ११ डावांत ५३७ धावा केल्या. तो त्या हंगामात महाराष्ट्रासाठी सर्वाधिक धावा करणारा फलंदाज होता. आगामी सामन्यासाठी संघात शॉसोबत अनिकेत बावणे, विकी ओस्तवाल, राजवर्धन हंगरगेकर आणि मुकेश चौधरी यांसारखे अनुभवी खेळाडू असतील.

पृथ्वी शॉची कर्णधार म्हणून लाल चेंडू आणि पांढऱ्या चेंडूच्या दोन्ही प्रकारांमधील कामगिरी प्रभावी राहिली आहे. २०१८ मध्ये त्याने भारतीय १९ वर्षांखालील संघाला विश्वचषक स्पर्धेत अजिंक्य विजय मिळवून दिला, अंतिम सामन्यात ऑस्ट्रेलियाला आठ गडी राखून पराभूत केले. त्यानंतर त्याने मुंबईला २०२१-२२ रणजी ट्रॉफीच्या अंतिम फेरीत पोहोचवले आहे. जिथे संघ मध्य प्रदेशकडून उपविजेता ठरला. त्याने मुंबईला विजय हजारे ट्रॉफीचे विजेतेपदही मिळवून दिले आहे. त्या हंगामात त्याने ऐतिहासिक ८२७ धावा केल्या आहेत. ज्यात एका मॅरेथॉन नाबाद २२७ धावांचा समावेश होता. आता तो पहिल्यांदाच महाराष्ट्र संघाचे नेतृत्व करणार आहे.

देशांतर्गत क्रिकेटमध्ये सातत्याने धावा करूनही शॉला भारतीय संघात पुनरागमन करता आलेले नाही. याचे एक प्रमुख कारण म्हणजे क्रिकेटच्या मैदानाबाहेरील वाद. अलीकडेच त्याचा विवाह संपुष्टात आला आहे. साखरपुड्यानंतर अवघ्या सहा महिन्यांतच त्याची होणारी पत्नी त्याच्यापासून विभक्त झाली.