IPL 2023: अनिल कुंबळेंच्या जागी पंजाब किंग्सकडून नव्या हेड कोचची नियुक्ती

Anil-Kumble

Image Credit source: instagram

मुंबई: इंडियन प्रीमियर लीगमधील फ्रेंचायजी पंजाब किंग्सने आपला कोच बदलला आहे. पुढच्या सीजनसाठी पंजाब किंग्सने नव्या कोचच्या नावाची घोषणा केली आहे. पंजाब किंग्सने ट्रेवर बेलिस यांची हेड कोच पदावर नियुक्ती केली आहे. ट्रेवर बेलिस यांच्याच मार्गदर्शनाखाली इंग्लंडने आपला पहिला वर्ल्ड कप जिंकला आहे. बेलिस माजी कोच आणि महान लेग स्पिनर अनिल कुंबळे यांची जागा घेणार आहेत. पंजाब किंग्सने टि्वट करुन ही माहिती दिलीय.

पंजाबचा विजेतेपदाचा दुष्काळ संपणार?

पंजाबची टीम पहिल्या सीजनपासून म्हणजे 2008 पासून आयपीएल खेळत आहे. पण अजूनपर्यंत एकदाही त्यांना विजेतेपद मिळवता आलेलं नाही. 2014 मध्ये पंजाबची टीम फायनलमध्ये पोहोचली होती. पण त्यांना विजेतेपदाने हुलकावणी दिली. बेलिस यांच्या येण्याने विजेतेपदाच दुष्काळ संपेल, अशी पंजाब टीम मॅनेजमेंटची अपेक्षा असेल.

आयपीएलमध्ये शानदार रेकॉर्ड

बेलिस यांच्या मार्गदर्शनाखाली इंग्लंडने 2019 मध्ये पहिला वर्ल्ड कप जिंकला. 2007 मध्ये श्रीलंकन टीमचे ते मुख्य कोचही होते. त्याचवर्षी श्रीलंकेची टीमही वर्ल्ड कप फायनलमध्ये पोहोचली होती. पण ऑस्ट्रेलियाने त्यांना पराभूत केलं होतं. आयपीएलमध्ये कोचिंग करण्याची त्यांची पहिली वेळ नाहीय. यापूर्वी ते कोलकाता नाइट रायडर्सचे कोच होते. त्यावेळी दोनवेळा कोलकाता टीमने आयपीएलचे जेतेपद मिळवलं.

सनरायजर्स हैदराबादचे कोच होते

कोलकाताच्या टीमने 2012 आणि 2014 यावर्षी आयपीएलच विजेतेपद मिळवलं होतं. त्यावेळी बेलिस टीमचे मुख्य कोच होते. इंग्लंडला वर्ल्ड कप जिंकून दिल्यानंतर ते पुन्हा आयपीएलमध्ये परतले होते. सनरायजर्स हैदराबादचे कोच होते. त्यावर्षी हैदराबादने प्लेऑफमध्ये प्रवेश केला होता. त्यानंतरच्या सीजनमध्ये टीमची कामगिरी चांगली झाली नाही.म्हणून फ्रेंचायजीने बेलिस यांना हटवलं.