SL vs ZIM : झिंबाब्वेकडून पुन्हा उलटफेर, ऑस्ट्रेलियानंतर श्रीलंकेला दणका, 6 विकेट्सने दणदणीत विजय

Sikandar Raza And Brian Bennett SL vs ZIM

Image Credit source: @ZimCricketv X Account

आयसीसी टी 20I वर्ल्ड कप 2026 स्पर्धेत बी ग्रुपमधील झिंबाब्वे क्रिकेट टीमने ऐतिहासिक कामगिरी केलीय. झिंबाब्वेने साखळी फेरीतील आपल्या चौथ्या आणि शेवटच्या सामन्यात सहयजमान श्रीलंकेला मोठा झटका दिला आहे. झिंबाब्वेने ऑस्ट्रेलियानंतर श्रीलंकेला पराभूत करत उलटेफर केला आहे. श्रीलंकेने कोलंबोतील आर प्रेमदासा स्टेडियममध्ये आयोजित करण्यात आलेल्या सामन्यात झिंबाब्वेसमोर 179 धावांचं आव्हान ठेवलं होतं. झिंबाब्वेने हे आव्हान 3 बॉलआधी 4 विकेट्सच्या मोबदल्यात पूर्ण केलं. झिंबाब्वेने 19.3 ओव्हरमध्ये 6 विकेट्स राखून 182 धावा केल्या.

ओपनर ब्रायन बेनेट आणि टोनी मुनयोंगा या जोडीने झिंबाब्वेला विजयापर्यंत पोहचवलं. ब्रायन बेनेट याने सर्वाधिक योगदान दिलं. ब्रायनने 48 बॉलमध्ये 8 फोरसह नॉट आऊट 63 रन्स केल्या आणि झिंबाब्वेला विजयी केलं. टोनी मुनयोंगा याने 3 चेंडूत 1 सिक्ससह निर्णायक 8 धावा जोडल्या. कॅप्टन सिंकदर रझा याने 4 सिक्स आणि 2 फोरसह 26 बॉलमध्ये झंझावाती 45 धावा केल्या. तदिवानाशे मारुमणी आणि रायन बर्ल या दोघांनीही विजयात योगदान दिलं. मारुमणी याने 26 चेंडूत 34 धावा केल्या. तर रायने 23 धावा जोडल्या. झिंबाब्वेने यासह सलग आणि एकूण तिसरा विजय मिळवला. तर झिंबाव्वेचा साखळी फेरीतील 1 सामना हा पावसामुळे रद्द झाला. झिंबाब्वेने यासह साखळी फेरीत एकूण 7 गुण मिळवले. झिंबाब्वे यासह बी ग्रुपमधून टेबल टॉपर ठरली.

श्रीलंकेची बॅटिंग

त्याआधी श्रीलंकेने टॉस जिंकून बॅटिंग करण्याचं ठरवलं. श्रीलंकेच्या पहिल्या 4 फलंदाजांनी केलेल्या खेळीच्या जोरावर सहयजमान संघाने झिंबाब्वे विरुद्ध 7 विकेट्स गमावून 178 धावांपर्यंत मजल मारली. ओपनर पाथुम निसांका याने ऑस्ट्रेलिया विरूद्धच्या शतकी खेळीनंतर झिंबाब्वे विरुद्ध अर्धशतक झळकावलं. पाथुमने 41 बॉलमध्ये 62 रन्स केल्या. कुसल परेरा याने 22 धावंचं योगदान दिलं. पवन रथनायके याने 25 चेंडूत 44 धावा करत फटकेबाजी केली. दुनिथ वेल्लालागे याने अखेरच्या क्षणी नाबाद 15 धावा जोडल्या. तर कुसल मेंडीस याने 14 रन्स केल्या. झिंबाब्वेलाठी ब्लेसिंग मुझारबानी, ब्रॅड एव्हान्स आणि ग्रेमी क्रिमेर या त्रिकुटानी प्रत्येकी 2-2 विकेट्स मिळवल्या.

झिंबाब्वेकडून ऑस्ट्रेलियाची शिकार

दरम्यान झिंबाब्वेने याआधी 13 फेब्रुवारीला वर्ल्ड चॅम्पियन ऑस्ट्रेलिया टीमला दणका दिला होता. झिंबाब्वेने ऑस्ट्रेलियावर 23 धावांनी मात केली होती. झिंबाब्वेची ऑस्ट्रेलियाला टी 20I वर्ल्ड कप स्पर्धेत पराभूत करण्याची ही दुसरी वेळ ठरली. झिंबाब्वेने याआधी 2007 साली पहिल्याच टी 20I वर्ल्ड कप स्पर्धेत ऑस्ट्रेलियाला पराभवाची धुळ चारली होती.