वर्ल्डकप खेळणे नाही तर ‘हे’ आहे विराटचं स्वप्न; स्वतःला का मानत नाही सर्वोत्कृष्ट फलंदाज? उत्तर वाचून वाटेल अभिमान
Virat Kohli : आपण स्वतःला आतापर्यंतचा सर्वोत्कृष्ट फलंदाज का मानत नाही, याचा उलगडा करताना विराटने त्याच्या भावना व्यक्त केल्या. तसेच, 2023 च्या विश्वचषक अंतिम सामन्यातील पराभवाची सल आजही मनात असल्याची खंत विराटने यावेळी बोलून दाखवली.
तिरुवनंतपुरममध्ये आज भारत विरुद्ध वेस्ट इंडिज यांच्यामधील एकदिवसीय सामन्यांच्या मालिकेला सुरुवात झाली आहे. या मालिकेत टीम इंडियाचे स्टार रोको म्हणजे विराट आणि रोहित शर्मा यांच्या खेळीकडे लक्ष लागले आहे. पण आता विराट कोहलीने मुलाखतीत केलेल्या वक्तव्याची चर्चा होत आहे. “केवळ विश्वचषक स्पर्धेत सहभागी होणे हे आपले ध्येय नसून, त्यापलीकडे जाऊन भारताला चॅम्पियन बनवणे हे आपले स्वप्न’ असल्याचे माजी कर्णधार विराट कोहलीने स्पष्ट केले आहे. वनडे विश्वचषकापूर्वी एका मुलाखतीत त्याने या स्वप्नावर भाष्य केले आहे. तसेच, क्रिकेट जगतात त्याला सर्वोत्तम फलंदाज मानले जात असले तरी, तो स्वतःला तसे मानत नाही, याचाही मोठा उलगडा विराटने केला आहे.
काय आहे कोहलीचे स्वप्न’?
विराट म्हणाला, “मी नेहमीच असा खेळाडू राहिलो आहे, ज्याला आपल्या संघासाठी जास्तीत जास्त सामने जिंकायचे असतात. अंतिम सामन्यात धावांचा पाठलाग करताना मॅच विनिंग खेळी करून भारताला विश्वचषक जिंकून द्यावा, हे माझे सर्वात मोठे स्वप्न आहे. माझ्यासाठी विश्वचषकाची ट्रॉफी उंचावणे सर्वात महत्त्वाचे आहे.”
स्वतःला सर्वोत्कृष्ट का मानत नाही?
जगातील सर्वोत्तम फलंदाज असल्याच्या प्रश्नावर विराटने अत्यंत नम्रपणे उत्तर दिले. “मी स्वतःला आतापर्यंतचा सर्वोत्कृष्ट फलंदाज मानत नाही. वेगवेगळ्या दशकांमध्ये अनेक दिग्गज खेळाडू होऊन गेले आहेत आणि काहींची आकडेवारी माझ्यापेक्षाही भारी आहे. प्रत्येक खेळाडूचे ध्येय संघासाठी भरीव योगदान देणे हेच असते. देशासाठी दीर्घकाळ खेळायला मिळणे, हा मी माझा सन्मान मानतो,” अशी भावना त्याने व्यक्त केली.
2023 विश्वचषक फायनलची सल कायम
2023 च्या वनडे विश्वचषक फायनलमधील पराभवाची सल आजही मनात असल्याचे विराटने सांगितले. “तो पराभव पचवणे खूप कठीण होते. अंतिम सामन्यात मी 54 धवांवर खेळत होतो आणि मोठ्या शतकासाठी सज्ज होतो. जर मी त्यावेळी 140-150 धावांची मोठी खेळी केली असती, तर आपण तो सामना नक्कीच जिंकला असता,” अशी खंत विराटने व्यक्त केली.
