गंभीर यांच्या बर्थडे पार्टीचा वेस्ट इंडिजने केला बेरंग! 248 धावांचं लक्ष्य गाठता आलं नाही, भारताचा 24 धावांनी पराभव

भारत विरुद्ध वेस्ट इंडिजच्या चौथ्या टी२० सामन्यात वेस्ट इंडिजने भारताला २४ धावांनी हरवले आहे. हैदराबाद येथील राजीव गांधी आंतरराष्ट्रीय स्टेडियमवर प्रथम फलंदाजी करताना वेस्ट इंडिजने २० षटकांत ३ गडी गमावून २४७ धावा केल्या. कर्णधार शाई होपने शतक झळकावले. प्रत्युत्तरात, भारतीय संघ १९.४ षटकांत सर्व गडी गमावून केवळ २२३ धावाच करू शकला. यामुळे आता या मालिकेत २-२ अशी बरोबरी झाली आहे.

अर्शदीप सिंगला हाताला दुखापत झाल्याने तो रिटायर्ड आऊट झाला. भारतासाठी संजू सॅमसनने सर्वाधिक ५६ धावा केल्या. वेस्ट इंडिजकडून कीमो पॉलने ५ बळी घेतले. चौथ्या टी२० सामन्यात प्रथम फलंदाजी करताना वेस्ट इंडिजने शाई होपच्या शतकाच्या जोरावर २० षटकांत ३ गडी गमावून २४७ धावा केल्या. शाई होपने संघासाठी सर्वाधिक १०२ धावा केल्या. भारताला अक्षर पटेल, अर्शदीप आणि प्रिन्स यादव यांनी यश मिळवून दिले.

प्रत्युत्तरात भारताने पाचव्या षटकात संजू सॅमसनला गमावले. संजूने २३ चेंडूंमध्ये ५६ धावा केल्या. इशान किशनला केवळ ६ धावा करता आल्या. कीमो पॉलने डावाच्या पाचव्या षटकात दोन्ही फलंदाजांना बाद केले. अभिषेक शर्मा २४ चेंडूंमध्ये २९ धावांवर बाद झाला. नमन धीर शून्यावर बाद झाला. तिलक वर्माने २५ चेंडूंमध्ये ४३ धावा केल्या आणि नितीश कुमार रेड्डीसोबत ३२ चेंडूंमध्ये ७० धावांची भागीदारी केली. नितीश कुमार रेड्डीने २० चेंडूंमध्ये ४१ धावा केल्या. प्रिन्स नाबाद राहिला आणि अक्षर पटेलने तीन धावा केल्या.

१४ ऑक्टोबरची सुरुवात भारतीय संघासाठी आनंदाची झाली. कारण तो दिवस मुख्य प्रशिक्षक गौतम गंभीर यांचा वाढदिवस होता. नुकतेच ४५ वर्षांचे झालेल्या गंभीर यांना आपल्या संघाकडून फक्त एका गिफ्टची गरज होती. तो म्हणजे एक विजय. हैदराबादमधील चौथ्या टी२० सामन्यातील विजयाने मालिका जिंकली असती, ज्यामुळे प्रशिक्षक गंभीर यांचा आनंद द्विगुणी झाला असता. पण या दौऱ्यावर भारतीय संघासाठी सातत्याने डोकेदुखी ठरलेल्या वेस्ट इंडिजचा कर्णधार शाई होपने सर्व आशांवर पाणी फेरले.