AFG vs SL : अफगाणिस्तानकडून स्पर्धेत तिसरा मोठा उलटफेर, इंग्लंड पाकिस्ताननंतर श्रीलंकेला दे धक्का
World Cup 2023 : वनडे वर्ल्डकप स्पर्धेत अफगाणिस्तानने तिसरा धक्का दिला आहे. इंग्लंड, पाकिस्ताननंतर श्रीलंकेला पराभूत केलं आहे. अफगाणिस्तानने जबरदस्त कामगिरी करत तीन संघांना पराभवाचं पाणी पाजलं आहे.
मुंबई : वनडे वर्ल्डकप स्पर्धेत अफगाणिस्तानने जबरदस्त कामगिरीचं प्रदर्शन केलं आहे. तीन दिग्गज संघांना पराभूत स्पर्धेतील अस्तित्व दाखवून दिलं आहे. त्यामुळे अफगाणिस्तानला दुबळा संघ म्हणून गृहीत धरणं चांगलंच महागात पडू शकतं. अफगाणिस्तानने उपांत्य फेरीच्या दिशेने पाऊल टाकलं आहे. तर श्रीलंकेची उपांत्य फेरीची वाट आणखी बिकट केली आहे. अफगाणिस्तानने नाणेफेकीचा कौल जिंकत प्रथम गोलंदाजी करण्याचा निर्णय घेतला. तसेच श्रीलंकेला 241 धावांवर रोखलं आणि विजयासाठी 242 धावांचं आव्हान मिळालं. हे आव्हान अफगाणिस्तानने 28 चेंडू राखून आणि तीन गडी गमवून सहज पूर्ण केलं. अफगाणिस्तानला पहिल्याच षटकात धक्का मिळाला होता. पण त्यानंतर इब्राहीम झादरान आणि रहमत शाह यांनी डाव सावरला.
अफगाणिस्तानचा डाव
अफगाणिस्तानला रहमनुल्लाह गुरबाज याच्या रुपाने पहिला धक्का बसला. त्यानंतर इब्राहीम झादरान आणि रहमत शाह या जोडीने 73 धावांची भागीदारी केली. तर रहमत शाह, हशमतुल्लाह शाहिदी आणि अझमतुल्लाह ओमरजाई यांनी अर्धशतकी खेळी केली. त्यामुळे अफगाणिस्तानचा विजय सोपा झाला. श्रीलंकेकडून मदुशंका याने 2, तर कसुन रजिथा याने 1 गडी बाद केला. या व्यतिरिक्त एकाही गोलंदाजाला गडी बाद करण्यात यश आलं नाही.
गुणतालिकेत अफगाणिस्तानने 6 गुणांसह पाचव्या स्थानी झेप घेतली आहे. अफगाणिस्तानचा पुढचा सामना 3 नोव्हेबर रोजी नेदरलँडशी आहे. त्यानंतर 7 नोव्हेंबरला ऑस्ट्रेलियाशी आणि 10 नोव्हेंबरला दक्षिण आफ्रिकेशी लढत असणार आहे. अफगाणिस्तानचा फॉर्म पाहता दिग्गज संघांनी कमी लेखून चालणार नाही. गुणतालिकेत श्रीलंकेचा संघ सहाव्या स्थानी असून उपांत्य फेरीसाठी मोठ्या चमत्काराची आवश्यकता आहे.
दोन्ही संघांची प्लेइंग इलेव्हन
अफगाणिस्तान (प्लेइंग इलेव्हन): रहमानउल्ला गुरबाज, इब्राहिम झद्रान, रहमत शाह, हशमतुल्ला शाहिदी (कर्णधार), अजमतुल्ला ओमरझाई, इक्रम अलीखिल (विकेटकीपर), मोहम्मद नबी, रशीद खान, मुजीब उर रहमान, नवीन-उल-हक, फजलहक फारुकी
श्रीलंका (प्लेइंग इलेव्हन): पथुम निसांका, दिमुथ करुणारत्ने, कुसल मेंडिस (कर्णधार/विकेटकीपर), सदीरा समरविक्रमा, चारिथ असलंका, धनंजया डी सिल्वा, अँजेलो मॅथ्यूज, महेश थेक्षाना, कसून रजिथा, दुष्मंथा चमीरा, दिलशान मधुशंका
