World Cup 2023 Points Table : अफगाणिस्तानच्या विजयाने पाकिस्तानला बसला धक्का, गुणतालिकेत झाला असा बदल

World Cup 2023 Points Table : अफगाणिस्तानमुळे पाकिस्तानचं टेन्शन वाढलं, जर तरचं गणित आणखीन किचकट झालं

Image Credit source: Twitter

मुंबई : वनडे वर्ल्डकप स्पर्धेत अफगाणिस्तानने श्रीलंकेला पराभूत करत तिसरा मोठा उलटफेर केला आहे. पुण्याच्या एमसीए मैदानात श्रीलंकेला पराभवाचं पाणी पाजलं. श्रीलंकेवर 7 गडी राखून विजय मिळवला आहे. या पराभवामुळे श्रीलंका आणि पाकिस्तान या दोन्ही संघांचं नुकसान झालं आहे. दोन्ही संघांचा उपांत्य फेरीचा प्रवास किचकट झाला आहे. आता जर तर शिवाय मोठा चमत्काराची गरज पाकिस्तानला आहे. अफगाणिस्तानने श्रीलंकेला पराभूत करत गुणतालिकेत पाचव्या स्थानी झेप घेतली आहे. श्रीलंका सहाव्या, तर पाकिस्ता सातव्या स्थानावर आहे. भारताचं उपांत्य फेरीचं स्थान निश्चित झालं आहे. त्याचबरोबर बांगलादेश आणि इंग्लंडचं आव्हान संपुष्टात आलं आहे.

भारतीय संघाने सहा सामने जिंकत 12 गुण आणि +1.405 नेट रनरेटसह पहिलं स्थान गाठलं आहे. दक्षिण अफ्रिकेनं 5 सामन्यात विजय मिळवत 10 गुण आणि +2.032 नेट रनरेटसह दुसऱ्या स्थानी झेप घेतली आहे. न्यूझीलंड 8 गुण आणि +1.232 नेट रनरेटसह तिसऱ्या, ऑस्ट्रेलिया 8 गुण आणि +0.970 नेट रनरेटसह चौथ्या स्थानी आहे. त्यामुळे उपांत्य फेरीसाठी हे चार संघ पात्र होतील असं चित्र आहे. पण एखादा मोठा उलटफेर झाला तर बदल होऊ शकतो.

वनडे वर्ल्डकप स्पर्धेत प्रत्येक संघाचे तीन सामने उरले आहेत. म्हणजेच सातवा टप्पा आता सुरू होणार आहे. पाचव्या, सहाव्या आणि सातव्या स्थानावरील संघांचा एखाद्या सामन्यात पराभव झाला तर उपांत्य फेरीतील आव्हान संपुष्टात येईल.सातव्या टप्प्यात पाकिस्तानचा सामना बांगलादेशशी होणार आहे. या सामन्यात बांगलादेशनं पाकिस्तानचा पराभव केला तर पाकिस्तानचं आव्हान जवळपास संपुष्टात येईल.

रॉबिन राउंड अर्थात साखळी फेरीत प्रत्येक संघ 9 सामने खेळणार आहे. आतापर्यंत प्रत्येक संघाचे सहा सामने खेळून झाले आहेत. टीम इंडिया हा एकमेव संघ असा आहे की एकाही सामन्यात पराभूत झालेला नाही. गुणतालिकेतील एक नंबरचा संघ चौथ्या क्रमांकाशी, तर दुसऱ्या आणि तिसऱ्या क्रमांकाच्या लढत उपांत्य फेरीत होणार आहे. उपांत्य फेरीचा सामना 15 नोव्हेंबर आणि 16 नोव्हेंबरला होईल. अंतिम फेरीचा सामना 19 नोव्हेंबरला होणार आहे.