Vaibhav Sooryavanshi: इतकं चांगले खेळूनही वैभवला आणखी किती थांबावे लागणार? श्रेयस अय्यरने स्पष्टच सांगितलं

Shreyas Iyer On Vaibhav Sooryavanshi: भारतीय कर्णधार श्रेयस अय्यर शनिवारी म्हणाला की, वेस्ट इंडिजविरुद्धच्या पाच सामन्यांच्या टी-२० आंतरराष्ट्रीय मालिकेत जर त्याच्या संघाने गमावलेल्या दोन सामन्यांमध्ये चांगली गोलंदाजी केली असती, तर मालिकेचा निकाल वेगळा लागला असता. पाचवा आणि अंतिम टी-२० आंतरराष्ट्रीय सामना पावसामुळे रद्द झाल्यानंतर, मालिका २-२ अशी बरोबरीत संपली.

भारतीय कर्णधार अय्यर म्हणाला, “जर आम्ही दुसऱ्या आणि चौथ्या सामन्यात चांगली गोलंदाजी केली असती, तर निकाल वेगळा लागला असता. पण विरोधी संघालाही श्रेय दिले पाहिजे; त्यांनी चांगली फलंदाजी केली, विशेषतः ज्या प्रकारे शाई होप संपूर्ण मालिकेत फलंदाजी करत होता.”

वैभव सूर्यवंशीबद्दल काय म्हणाला?

संपूर्ण मालिकेत बेंचवर बसलेल्या वैभव सूर्यवंशीसारख्या खेळाडूबद्दल काय बोलशील विचारल्यावर अय्यर म्हणाला, “मी त्याला फक्त एवढेच सांगतो की तुला नक्कीच संधी मिळेल. जर तू तुझ्या तयारीवर आणि प्रक्रियेवर सातत्याने कठोर परिश्रम करत राहिलास, तर संधी नक्कीच मिळेल, पण कधीकधी तुला थांबायलाही लागू शकते. आमच्याकडे दोन उत्कृष्ट सलामीवीर आहेत.”

शाई होप काय म्हणाला?

भारतीय संघ रविवारी न्यूझीलंडसाठी रवाना होईल, जिथे २२ ऑक्टोबर रोजी क्राइस्टचर्चमध्ये पाच सामन्यांची मालिका सुरू होईल. वेस्ट इंडिजचा कर्णधार शाई होप म्हणाला की, “माझा संघ मालिका जिंकण्यासाठी पूर्णपणे पात्र होता. आम्ही (भारतात मालिका जिंकण्याच्या) खूप जवळ होतो. गेल्या २० वर्षांहून अधिक काळात आम्ही असे काही केलेले नाही. आम्ही निश्चितपणे पुढे जात आहोत. यश म्हणजे केवळ मालिका जिंकणे नव्हे.”

भारतातील आपल्या प्रभावी कामगिरीबद्दल बोलताना विंडिज कर्णधार शाई होप म्हणाला, “ज्या पद्धतीने आम्ही क्रिकेट खेळलो, खेळाडूंनी वेगवेगळ्या वेळी जबाबदारी स्वीकारली. जरी तुम्ही गेल्या चार-पाच सामन्यांमध्ये धावा केल्या नसतील, तरीही तुम्हाला स्वतःवर विश्वास ठेवावा लागतो. माझी कार्यपद्धती कधीच बदलत नाही आणि मला वाटते की मी खूप चांगली तयारी करतो.”