India vs Australia 2020 | फिंच-वॉर्नरची सलामी शतकी भागीदारी, इतिहासात पहिल्यांदाच भारताच्या नावावर नकोसा विक्रम

कांगारुंच्या ओपनिंग जोडीच्या बहारदार परफॉरमन्सनंतर भारताच्या नावावर नकोसा विक्रम नोंदवला गेला आहे.

Akshay Adhav | Updated on: Nov 29, 2020 | 12:30 PM

सिडनी : भारत विरुद्ध ऑस्ट्रेलिया (India vs Australia 2020) दुसऱ्या वनडे सामन्यात देखील ऑस्ट्रेलियाच्या फलंदाजांनी कमाल केली. डेव्हिड वॉर्नर (David Warner) आणि अ‌ॅरॉन फिंचने (Aron Finch) पहिल्या विकेटसाठी 142 रन्सची भागीदारी रचली. मालिकेत दुसऱ्यांदा डेव्हिड वॉर्नर-अ‌ॅरॉन फिंच जोडीने शतकी सलामी दिली. कांगारुंच्या ओपनिंग जोडीच्या बहारदार परफॉरमन्सनंतर भारताच्या नावावर नकोसा विक्रम नोंदवला गेला आहे. इतिहासात आतापर्यंत असा विक्रम भारताच्या नावावर नोंदवला गेला नव्हता. (India For the First Time In History have 3 Consistancy 100 opening partnership)

भारतीय संघाच्या एकदिवसीय सामन्यांच्या इतिहासात अशी घटना पहिल्यांदा घडलीये की सलग तीन मॅचमध्ये प्रतिस्पर्धी संघाच्या ओपनिंग जोडीने शतकी भागीदारी रचली आहे. भारत-ऑस्ट्रेलिया पहिल्या एकदिवसीय सामन्यात डेव्हिड वॉर्नर-अ‌ॅरॉन फिंच जोडीने पहिल्या विकेटसाठी 156 रन्सची पार्टनरशीप केली. आज तोच कित्ता गिरवत फिंच-वॉर्नर जोडीने 142 रन्सची भागीदारी करुन ऑस्ट्रेलियाला दमदार सुरुवात करुन दिली. या दोन मॅचच्या अगोदर भारत शेवटचा एकदिवसीय सामना न्यूझीलंडविरुद्ध खेळला होता. त्या शेवटच्या मॅचमध्ये न्यूझीलंडच्या ओपनिंग जोडीने शतकी सलामी दिली होती. न्यूझीलंडच्या ओपनर्सनी 106 धावांची भागीदारी केली होती.

भारताने आतापर्यंतच्या इतिहासात 978 एकदिवसीय मॅच खेळल्या आहेत. या मॅचेसमध्ये असं एकदाही झालं नव्हतं की प्रतिस्पर्धी संघाच्या बॅट्समनने भारताविरुद्ध सलग तीनदा शतकी भागीदारी रचल्या होत्या. मात्र ऑस्ट्रेलिया दौऱ्यावर भारताच्या नावे आता नको असणारा विक्रम नोंदवला गेला आहे.