KL Rahul Wicket: अरेरे! केएल राहुल हे काय करुन बसला, पहिल्या डावात झिरो अन् दुसऱ्या डावात विचित्र प्रकार केला, Video Viral

KL Rahul Wicket Video: भारत ‘अ’ संघासाठी खेळणाऱ्या सलामीवीर केएल राहुलला पहिल्या अनधिकृत कसोटीच्या दुसऱ्या डावातही अपयश आले. न्यूझीलंड ‘अ’ संघाविरुद्धच्या सामन्यात राहुल १५ चेंडूंमध्ये केवळ ४ धावाच करू शकला. राहुल ज्या प्रकारे बाद झाला, ते खूपच विचित्र होते, कारण चेंडू अडवण्याच्या प्रयत्नात त्याची बॅट यष्टींवर आदळली आणि तो हिट-विकेट बाद झाला. पहिल्या डावात तर त्याला आपले खातेही उघडता आले नाही.

एक शॉट खेळल्यानंतर केएल राहुलचा गोंधळ उडाला. राहुलने चेंडू अडवण्याचा प्रयत्न केला असता, तो खेळपट्टीवरून उसळून यष्टींच्या दिशेने गेला. चेंडू यष्टींना लागल्यास आपण बाद होऊ, असे राहुलला वाटले. चेंडू यष्टींपर्यंत पोहोचू नये म्हणून त्याने आपली बॅट पुढे केली, पण त्याचा तोल गेला आणि त्याची बॅट यष्टींना आदळली, ज्यामुळे तो हिट-विकेट बाद झाला. राहुलच्या हिट-विकेटचा व्हिडिओ सोशल मीडियावर वेगाने व्हायरल होत आहे. राहुलवर मोठी नामुष्की ओढवली गेली.

Rahul you cannot be fucking serious ???? 😭

Hit wicket ?! https://t.co/GKmSjHXe57

— MJ ⊙⊝⊜ (@mj_alwayss) October 25, 2026

दरम्यान, या सामन्यात इंडिया ‘अ’ संघाला केवळ ११३ धावांवर रोखण्यात आले. या डावात इंडिया ‘अ’ संघाचे पाच फलंदाज खाते उघडण्यात अपयशी ठरले. इंडिया ‘अ’ संघाकडून यश राठोडने ४९ चेंडूंमध्ये नाबाद ४४ धावा करून सर्वाधिक धावा केल्या. देवदत्त पडिक्कलनेही ३२ धावांचे योगदान दिले, तर यशस्वी जैस्वालने १७ आणि अंशुल कंबोजने १० धावा केल्या.

इंडिया ‘अ’ संघाच्या धावसंख्येला प्रत्युत्तर म्हणून, न्यूझीलंडने जोरदार फलंदाजी करत आपल्या पहिल्या डावात ३१७ धावा केल्या आणि इंडिया ‘अ’ संघावर २०४ धावांची आघाडी घेतली. त्यानंतर, जेव्हा इंडिया ‘अ’ संघ आपल्या दुसऱ्या डावात फलंदाजीसाठी मैदानात उतरला, तेव्हा यशस्वी जैस्वाल आणि केएल राहुल स्वस्तात बाद झाले, परंतु देवदत्त पडिक्कल (५६) आणि साई सुदर्शन (३९) यांनी दुसऱ्या दिवसाच्या अखेरपर्यंत एकही गडी न गमावता डाव सांभाळून धरला. दिवसअखेरीस, भारत ‘अ’ संघाने २ गडी गमावून १०६ धावा केल्या होत्या आणि आता ते न्यूझीलंडपेक्षा केवळ ९८ धावांनी मागे आहेत.