कारच्या इंजिनमध्ये काळ… बोनट उघडताच 7 फूटाचा अजगर पाहून थरकाप; दहिसरच्या घटनेने सर्वच हादरले

जरा विचार करा… तुम्ही कारचं बोनट उघडलं आणि तुमच्यासमोर भला मोठा अजगर वेटोळे घालून बसलेला दिसला तर काय कराल? या भल्या मोठ्या अजगराला पाहून तुमची बोबडी वळल्याशिवाय राहणार नाही. मुंबईच्या दहिसरमधला एक व्हिडीओ सोशल मीडियावर व्हायरल होत आहे. या व्हिडीओत एक 7 फूटाचा अजगर कारच्या बोनटमध्ये काळ बनून आरामात बसल्याचं दिसून येतंय. हा व्हिडीओ पाहूनच अनेकांची तंतरली आहे. अंगाचा थरकाप उडाला आहे. व्हिडीओ पाहणाऱ्या प्रत्येकाच्या काळजात धस्स झाल्याशिवाय राहत नाही, इतकं हे भयानक दृश्य आहे.

दहिसरच्या फ्लायओव्हरच्या जवळ महेश्वरी इमारत आहे. कांदारपाड्याच्या बापू बागवे रोडवर ही इमारत आहे. स्थानिक रहिवाशी सन्नी कांबळे यांच्या बहिणीची कार या इमारतीत पार्क करण्यात आलेली होती. शनिवारी दुपारी ही कार इमारतीत पार्क होती. यावेळी काही लोकांनी एक महाकाय अजगर हळूहळू या कारच्या खालून बोनटच्या आत जाताना पाहिला. त्यामुळे लोकांमध्ये खळबळ उडाली. कारमध्ये साधासुधा काप नाही तर अजगर जाऊन बसल्याचं सोसायटीतील लोकांना कळताच लोकांमध्ये एकच घबराट निर्माण झाली.

अजगर पकडताना तारेवरची कसरत

हा अजगर पाहण्यासाठी कारच्या आसपास मोठी गर्दी झाली. कारच्या मालकालाही तात्काळ याची माहिती देण्यात आली. त्यानंतर स्थानिकांनी वन्यजीव रेस्क्यू टीमशी संपर्क साधून त्यांना घटनास्थळी बोलावलं. रेस्क्यू एक्सपर्ट समीर गुप्ता यांनी तात्काळ घटनास्थळी धाव घेतली. गुप्ता यांनी कारचं बोनट उघडलं तर त्यांनाही धक्का बसला. समोर वेटोळे घालून भला अजगर बसला होता. या अजगराने इंजिनला मजबूत वेटोळे घातले होते. त्यानंतर समीर गुप्ता यांनी मोठ्या शिताफिने या अजगरला कोणतीही इजा न करता अलगद पकडलं. विशेष म्हणजे त्याला पकडकताना गुप्ता यांनाही तारेवरची कसरत करावी लागली. कारण हा अजगर अत्यंत महाकाय होता.

अन् सुटकेचा नि:श्वास सोडला

त्यानंतर या अजगराला पकडून त्याला संजय गांधी राष्ट्रीय उद्यानात सोडून देण्यात आलं. अजगराला जंगलात सोडण्यापूर्वी त्याची वैद्यकीय तपासणी करण्यात आली. गरम इंजिनमुळे त्याला इजा तर नाही ना पोहोचली, हे चेक करण्यासाठी मेडिकल तपासणी करण्यात आली. अजगराला कोणतीही इजा झाली नसल्याची खात्री पटल्यावर त्याला जंगलात सोडून देण्यात आलं. जेव्हा अजगर कारच्या बोनटमधून काढण्यात आला, तेव्हा सर्वांनी सुटकेचा नि:श्वास सोडला. मात्र, सोसायटीत भला मोठा अजगर आल्याने अनेकांना धक्का बसला आहे.

ट्रेनमध्ये सापडला होता अजगर

जून महिन्यात अशीच एक घटना समोर आली होती. मडगाव-सीएसएमटी जन शताब्दी एक्सप्रेसच्या इंजिन केबिनमध्ये अजगराचं एक पिल्लू आढळून आलं होतं. रेल्वे टीम आणि पशू कल्याण अधिकाऱ्यांनी तात्काळ अजगर पकडून त्याला जंगलात सोडलं होतं. 24 जूनच्या रात्री 12 वाजून 45 मिनिटांनी ही घटना घडली. ट्रेन मुंबई छत्रपती शिवाजी महाराज टर्मिनसवर पोहोचल्यावर प्लॅटफॉर्म क्रमांक 11 वर काही वेळातच इंजिन केबिनमध्ये अजगराचं पिल्लू दिसलं होतं.