1, 10 की 28…; कोणत्या तारखेला SIP केल्यास जास्त परतावा मिळतो? 30 वर्षांच्या डेटाचा मोठा खुलासा
SIP साठी कोणती तारीख सर्वोत्तम? ३० वर्षांच्या डेटा विश्लेषणातून समोर आला मोठा खुलासा. जाणून घ्या महिन्याच्या कोणत्या तारखेला मिळतो सर्वाधिक परतावा.
शेअर बाजारात जेव्हा जेव्हा चढ-उतार होतात, तेव्हा म्युच्युअल फंड गुंतवणूकदारांच्या मनात एक संभ्रम नेहमी निर्माण होतो की मी माझी एसआयपी (SIP) थांबवू का? बाजार आणखी घसरण्याची वाट पाहू की एसआयपीची तारीख बदलून घेऊ, जेणेकरून जास्त नफा मिळेल? अनेकांचा असा समज असतो की, महिन्याची एक ठराविक तारीख निवडल्यास किंवा मंदीच्या काळात हुशारीने गुंतवणूक केल्यास दीर्घकाळात बंपर परतावा मिळतो. परंतु, बीएसई सेन्सेक्सच्या (BSE Sensex) तब्बल ३० वर्षांच्या टीआरआय (TRI) डेटाच्या विश्लेषणाने हा समज पूर्णपणे खोटा ठरवला आहे. बाजाराच्या टायमिंगचा परताव्यावर फारसा फरक पडत नसल्याचे एका अभ्यासातून समोर आले आहे.
परताव्यात केवळ ०.४८ टक्क्यांचा फरक
व्हाइटओक कॅपिटल म्युच्युअल फंडाने ऑगस्ट १९९६ ते एप्रिल २०२६ या ३० वर्षांच्या कालावधीत वेगवेगळ्या तारखांना केलेल्या एसआयपी गुंतवणुकीचा सखोल अभ्यास केला. याचे निष्कर्ष नुकतेच समोर आले आहेत. यानुसार जेव्हा बाजार सर्वात फायदेशीर स्थितीत होता, तेव्हा गुंतवणूकदारांना १३.८० टक्के परतावा मिळाला. तर मार्केट डाऊन असताना गुंतवणूक करणाऱ्यांना १३.३२ टक्के परतावा मिळाला. बाजाराचा कोणताही विचार न करता दरमहा एका निश्चित तारखेला एसआयपी सुरू ठेवणाऱ्यांना १३.५८ टक्के परतावा मिळाला. यानुसार सर्वोत्तम आणि सर्वात वाईट दिवसाच्या परताव्यामध्ये केवळ ०.४८ टक्के इतका किरकोळ फरक पाहायला मिळत आहे.
तारीख कोणतीही असो… परतावा सारखाच!
अनेक गुंतवणूकदार महिन्याच्या सुरुवातीला, मध्यभागी की शेवटी गुंतवणूक करावी? असा प्रश्न उपस्थित करतात. या प्रश्नाचे उत्तरही या अहवालात मिळाले आहे. महिन्याच्या वेगवेगळ्या तारखांना मिळालेला परतावा पाहिला तर त्यात कोणताही लक्षणीय फरक आढळत नाही.
- प्रत्येक महिन्याच्या १ तारखेला केलेल्या एसआयपीने १३.५९% परतावा दिला.
- महिन्याच्या १० तारखेला केलेल्या गुंतवणुकीवर १३.५५% परतावा मिळाला.
- महिन्याच्या २० तारखेच्या एसआयपीवर १३.५८% परतावा मिळाला.
- तर महिन्याच्या २८ तारखेला केलेल्या गुंतवणुकीवर १३.६१% परतावा मिळाला.
तुम्ही महिनाभरात कोणतीही तारीख निवडली, तरी दीर्घकालीन परतावा हा १३.५५% ते १३.६१% च्या दरम्यानच राहतो. या ३० वर्षांच्या ऐतिहासिक आकडेवारीवरून एक गोष्ट स्पष्ट होते की, एसआयपीमधील यशाची गुरुकिल्ली योग्य तारीख निवडण्यात नसून त्यात सातत्य राखण्यात आहे. बाजारातील चढ-उतारांना न घाबरता जी व्यक्ती नियमितपणे गुंतवणूक करत राहते, तिलाही बाजाराचा अचूक अंदाज लावणाऱ्या गुंतवणूकदारांइतकाच दमदार परतावा मिळतो.
(डिस्क्लेमर: म्युच्युअल फंड गुंतवणूक ही बाजार जोखमींच्या अधीन आहे. वरील माहिती केवळ शैक्षणिक उद्देशाने असून हा कोणताही गुंतवणुकीचा सल्ला नाही. गुंतवणूक करण्यापूर्वी कृपया आपल्या आर्थिक सल्लागाराचा सल्ला घ्या.)
