Shiv Sena UBT conflict : रशीद मामूंना तिकीट अन् ठाकरे गटातील खैरे-दानवे भिडले, संभाजीनगरात उमेदवारीवरून राडा

छत्रपती संभाजीनगर महानगरपालिका निवडणुकीच्या तोंडावर ठाकरे गटात उमेदवारीवरून अंतर्गत संघर्ष उफाळून आला आहे. रशीद मामू यांना प्रभाग क्रमांक चारमधून उमेदवारी दिल्याने ज्येष्ठ नेते चंद्रकांत खैरे यांनी तीव्र विरोध दर्शवला आहे. यामुळे चंद्रकांत खैरे आणि अंबादास दानवे यांच्यात जोरदार खडाजंगी सुरू झाली आहे. चंद्रकांत खैरे यांच्या मते, अंबादास दानवे यांनीच रशीद मामूंना तिकिट दिले आणि उद्धव ठाकरे यांना याबाबत माहिती नसल्याचे त्यांनी म्हटले आहे. मुंबई महापालिकेच्या कामात उद्धव ठाकरे व्यस्त असताना दानवे यांनी हा डाव साधल्याचा आरोप खैरे यांनी केला. तसेच, मामूंच्या उमेदवारीमुळे आपला अपमान झाल्याचे खैरे यांनी सांगितले.

दुसरीकडे, अंबादास दानवे यांनी खैरेंची नाराजी ही पक्षाच्या प्रक्रियेचा भाग असल्याचे नमूद केले. अनेक इच्छुक असल्याने काही जणांना नाराजी स्वाभाविक असते, असे ते म्हणाले. रशीद मामू हे पूर्वी काँग्रेसमध्ये होते आणि त्यांचा पक्षप्रवेश अंबादास दानवे यांनीच घडवून आणला होता. खैरेंच्या तीव्र विरोधानंतरही अखेर ठाकरे गटाने रशीद मामूंना उमेदवारी जाहीर केली, ज्यामुळे छत्रपती संभाजीनगरच्या राजकारणात नवे वारे वाहू लागले आहेत.