आता 100 टक्के न्याय मिळेल! दिशा सालियन यांच्या वडिलांची CBI तपासानंतर पहिली प्रतिक्रिया समोर

सेलिब्रिटी दिशा सालियान यांच्या मृत्यू प्रकरणाचा तपास आता केंद्रीय अन्वेषण ब्युरो (CBI) कडे सुपूर्द करण्यात आला आहे. मुंबई उच्च न्यायालयाने दिलेल्या महत्त्वपूर्ण निर्देशानंतर हा निर्णय घेण्यात आला आहे. या प्रकरणामुळे महाराष्ट्राच्या राजकारणात मोठा गदारोळ माजला होता आणि आता सीबीआयच्या एंट्रीमुळे पुन्हा एकदा या प्रकरणाला वेगळे वळण मिळण्याची शक्यता आहे.

दिशा सालियान यांचे वडील सतीश सालियान यांनी उच्च न्यायालयाच्या या आदेशाचे स्वागत केले आहे. टीव्ही ९ मराठीशी बोलताना त्यांनी आपली प्रतिक्रिया दिली. “कोर्टाने जे काही केले आहे, ते बरोबर केले आहे. त्यांच्या कुठले पुरावे नाहीत, त्यांचा यात संबंध असताना त्याचे काय कारण आहे? कोर्टाने जे काही केले आहे, ते योग्यच आहे,” असे ते म्हणाले. या निर्णयामुळे आता १०० टक्के न्याय मिळेल, असा ठाम विश्वास त्यांनी व्यक्त केला. “कोर्ट कधीही चूक करणार नाही,” असेही सालियान यांनी स्पष्ट केले.

या प्रकरणाच्या सुरुवातीपासूनच सतीश सालियान यांनी मुंबई पोलिसांच्या तपासावर सातत्याने प्रश्नचिन्ह उपस्थित केले होते. “मुंबई पोलिसांच्या माध्यमातून योग्य तो तपास झाला नाही,” अशी त्यांची वारंवार तक्रार होती. आता उच्च न्यायालयाने मुंबई पोलिसांना या प्रकरणाशी संबंधित सर्व तपास कागदपत्रे आणि गोळा केलेले पुरावे सीबीआयकडे तात्काळ हस्तांतरित करण्याचे आदेश दिले आहेत. यापुढे सीबीआय या प्रकरणाचा सखोल तपास करेल.

दिशा सालियान यांच्या मृत्यूला घातपात मानले जात असताना, या प्रकरणात युवासेना प्रमुख आदित्य ठाकरे यांच्यासह काही जणांवर मोठ्या प्रमाणात आरोप करण्यात आले होते. सतीश सालियान यांनीही या आरोपांच्या अनुषंगाने सीबीआयने आदित्य ठाकरे यांची चौकशी करावी, अशी मागणी केली आहे. “जे आरोप आहेत त्यांच्यावर, त्यांची चौकशी करायला लागेल,” असे सालियान म्हणाले. सीबीआयच्या तपासातून सत्य बाहेर येईल आणि दोषींना शिक्षा होईल, अशी आशा त्यांनी व्यक्त केली आहे.

या प्रकरणाने महाराष्ट्रातील राजकीय वर्तुळात अनेकदा वाद निर्माण केले होते. मुंबई पोलिसांचा तपास अनेकदा राजकीय दबावाखाली असल्याचा आरोप विरोधकांकडून करण्यात आला होता. आता सीबीआयसारखी केंद्रीय यंत्रणा तपास करणार असल्याने, प्रकरणाला निष्पक्ष आणि पारदर्शक स्वरूप मिळेल अशी अपेक्षा आहे. सतीश सालियान यांना विश्वास आहे की, सीबीआयच्या माध्यमातूनच त्यांना आणि त्यांच्या कुटुंबाला न्याय मिळेल. त्यांच्या या विश्वासाने आता या प्रकरणाकडे सर्वांचे लक्ष लागले आहे. कॅमेरामॅन कमलेश यांच्यासोबत निवृत्ती बाबर यांनी टीव्ही ९ मराठीसाठी मुंबईतून हे वृत्त दिले.