Video : धारावीच्या नव्या घरांचा व्हिडिओ समोर, आता झोपडपट्टी नाही तर, इमारतीत राहणार धारावीकर

मुंबईतील धारावी पुनर्वसन प्रकल्प आता अंतिम टप्प्यात असून, धारावीतील रहिवाशांना मिळणाऱ्या नव्या घरांचे व्हिडिओ समोर आले आहेत. टीव्ही ९ मराठीच्या कॅमेरात कैद झालेल्या या व्हिडिओतून नमुना फ्लॅटची रचना स्पष्टपणे दिसत आहे. आशियातील सर्वात मोठी झोपडपट्टी म्हणून ओळखल्या जाणाऱ्या धारावीचे पुनर्वसन हे एक मोठे आव्हान होते, जे आता राज्य सरकार आणि अदानी समूह यांच्या सहकार्याने मार्गी लागत आहे.

सध्या दाटीवाटीच्या झोपडपट्ट्यांमध्ये राहणाऱ्या धारावीकरांना आता प्रशस्त आणि सुसज्ज ३५० चौरस फुटांचा फ्लॅट मिळणार आहे. या नमुना घरात हॉल, लिव्हिंग रूम, डायनिंग रूम आणि आधुनिक टॉयलेटची व्यवस्था आहे. गेल्या अनेक वर्षांपासून छोट्या खोल्यांमध्ये आणि गल्लीबोळात जीवन जगणाऱ्या धारावीकरांसाठी हा बदल जीवनमान उंचावणारा ठरणार आहे. या प्रकल्पामुळे धारावीकरांना एक चांगले आणि सुरक्षित राहण्याचे ठिकाण उपलब्ध होईल, अशी अपेक्षा आहे.