Kalyan : शिवसेना माजी नगरसेवक उमेश बोरगावकरांवर जीवघेणा हल्ला, गाडीचाही केली तोडफोड; कल्याणामध्ये खळबळ, घडलं काय?

कल्याणमध्ये शिंदे गटाच्या शिवसेनेचे माजी नगरसेवक उमेश बोरगावकरांवर अज्ञातांकडून जीवघेणा हल्ला करण्यात आला आहे. या घटनेत बोरगावकरांसह आणखी दोन जण जखमी झाले आहेत. प्राथमिक माहितीनुसार, उमेश बोरगावकरांनी एका हाणामारीत मध्यस्थी करण्याचा प्रयत्न केला होता. त्यावेळी ओंकार नामक एका तरुणाला डोक्याला मार लागून रक्त आले होते. या घटनेनंतर ओंकारला उपचारांसाठी रुक्मिणीबाई रुग्णालयात नेण्यात आले होते.

उपचार आणि तक्रार दाखल करण्याची प्रक्रिया पूर्ण करून बोरगावकर आणि त्यांचे सहकारी रुग्णालयातून बाहेर पडत असताना त्यांच्या गाडीवर चारी बाजूंनी हल्ला करण्यात आला. मुलांच्या घोळक्याने त्यांची गाडी तोडली आणि बोरगावकरांवरही हल्ला केला. या हल्ल्यामध्ये एक जण गंभीर जखमी झाला असून, त्याच्यावर मुंबईतील रुग्णालयात उपचार सुरू आहेत. पोलिसांनी हल्लेखोरांचा शोध सुरू केला असून पुढील तपास करत आहेत. महाराष्ट्राच्या राजकारणात या घटनेने खळबळ उडाली आहे.