रायफल सोपवली अन् संविधान हाती घेतलं! अखेर भूपती सरेंडर झाला

गडचिरोली येथे नक्षलवादाविरोधातील महाराष्ट्र सरकारच्या चळवळीला मोठे यश मिळाले आहे. 60 नक्षलवाद्यांनी, ज्यात माओवादाचा प्रमुख चेहरा असलेला भूपती (मल्लो जुला वेणुगोपाळ) याचा समावेश आहे, मुख्यमंत्री देवेंद्र फडणवीसांसमोर आत्मसमर्पण केले. या नक्षलवाद्यांनी एके-47 रायफलसह इतर शस्त्रे सरकारकडे सोपवली.

मुख्यमंत्री फडणवीसांनी आत्मसमर्पण करणाऱ्यांच्या हाती संविधानाची प्रत देत, संविधानाद्वारेच समतेचा मार्ग उघडणार असल्याचे स्पष्ट केले. भूपतीने मुख्यमंत्र्यांसमोरच शरणागती पत्करण्याची अट ठेवली होती. या ऐतिहासिक आत्मसमर्पणानंतर फडणवीसांनी गडचिरोली पोलिसांना त्यांच्या उत्कृष्ट कार्यासाठी एक कोटी रुपयांचे बक्षीस जाहीर केले. भूपतीचे मुख्य काम थेट हल्ल्याऐवजी संघटना उभारणी आणि माओवादाचा प्रचार हे होते. त्याच्यासह 60 जणांनी हिंसेचा मार्ग सोडून आत्मसमर्पण केल्यामुळे नक्षलवादाला हा मोठा धक्का बसला आहे.

लवकरच छत्तीसगड आणि तेलंगणा येथील प्रमुख नक्षलवादीही आत्मसमर्पण करतील अशी माहिती फडणवीसांनी दिली आहे. यामुळे गडचिरोलीतील नक्षलमुक्त चळवळीला आणखी बळ मिळाले आहे.