Gokul Election Result : गोकुळमध्ये महायुतीला मोठा धक्का; तीन माजी चेअरमन पराभूत

गोकुळ दूध संघाच्या निवडणुकीचे निकाल हाती येत असताना सतेज पाटील यांच्या पॅनलने निवडणुकीत जोरदार आघाडी घेतली आहे. सतेज पाटील यांच्या पॅनलने १४ जागांवर आघाडी घेतली असून, महायुतीचे पॅनल ११ जागांवर आघाडीवर आहे. या निवडणुकीत महायुतीला मोठा धक्का बसला असून, त्यांचे तिन्ही माजी चेअरमन अरुण डोंगळे, नवीद मुश्रीफ आणि विश्वास पाटील यांना पराभव पत्करावा लागला आहे.

कोल्हापुरातील सतेज पाटील यांच्या कार्यालयाबाहेर सध्या कार्यकर्त्यांनी जल्लोष सुरू केला आहे. फटाके फोडून आणि गुलाल उधळून कार्यकर्ते विजयाचा आनंद साजरा करत आहेत. गोकुळमध्ये सत्ता स्थापनेच्या दिशेने सतेज पाटील यांच्या नेतृत्वाखालील समविचारी आघाडीची वाटचाल सुरू असून, आता केवळ विजयाची औपचारिकता बाकी आहे.

दरम्यान, या निवडणुकीत शौमिका महाडिक यांचा पराभव झाला आहे. त्यांनी फेर मतमोजणीची मागणी केली होती. त्यांच्या मागणीनंतर मतमोजणी पुन्हा सुरू झाली आहे आणि ती थोड्याच वेळात पूर्ण होईल अशी अपेक्षा आहे.