Gokul Milk Union Election 2026 : कोल्हापुरात गोकुळ दूधसंघ निवडणुकीसाठी आज मतदान प्रक्रिया पार

कोल्हापुरातील बहुचर्चित गोकुळ दूधसंघाच्या निवडणुकीसाठी आज मतदान प्रक्रिया सुरू आहे. स्वामी विवेकानंद महाविद्यालयात मतदारांनी मोठ्या प्रमाणात गर्दी केली आहे. कोल्हापूर जिल्ह्याच्या दृष्टीने ही निवडणूक अत्यंत प्रतिष्ठेची मानली जाते. ४,००० पेक्षा अधिक मतदार असलेल्या या संघाच्या २५ संचालकांच्या निवडीसाठी ही प्रक्रिया पार पडत आहे, ज्यामध्ये ५० उमेदवार रिंगणात आहेत.

या निवडणुकीत प्रामुख्याने दोन प्रमुख आघाड्यांमध्ये लढत होत आहे. सतेज पाटील यांच्या नेतृत्वाखालील महाविकास आघाडी समर्थित राजर्षी शाहू समविचारी आघाडी आणि हसन मुश्रीफ यांच्या नेतृत्वाखालील महायुती प्रणित छत्रपती शाहू शेतकरी विकास आघाडी हे पक्ष एकमेकांसमोर उभे ठाकले आहेत. सकाळी आठ वाजल्यापासून मतदानाला सुरुवात झाली असून, मतदारांचा उत्स्फूर्त प्रतिसाद मिळत आहे. सुमारे ४,००० कोटी रुपयांपेक्षा अधिक उलाढाल असलेल्या या दूधसंघावर कोणाचे वर्चस्व प्रस्थापित होते, याकडे जिल्ह्याचे आणि राज्याचे लक्ष लागले आहे.