किरीट सोमैया यांच्या बॉडीगार्डची पत्रकारांना धक्काबुक्की! नेमकं काय घडलं?

नाशिकमध्ये भाजप नेते किरीट सोमैया यांना पत्रकारांच्या प्रश्नांना सामोरे जाताना त्यांच्या अंगरक्षकांनी पत्रकारांना धक्काबुक्की केल्याची घटना समोर आली आहे. मालेगाव येथे एका कार्यक्रमासाठी आलेले सोमैया यांना कथित जन्म दाखिला घोटाळ्याच्या संदर्भात पत्रकारांनी प्रश्न विचारण्याचा प्रयत्न केला. या दरम्यान, त्यांच्या अंगरक्षकांनी अरेरावी करत पत्रकारांना पुढे जाण्यापासून रोखले आणि त्यांना धक्काबुक्की केली. यामुळे पत्रकार आणि सोमैया यांच्यात काही काळ तीव्र बाचाबाची झाली.

या वादग्रस्त परिस्थितीनंतर, किरीट सोमैया यांनी माध्यमांशी बोलताना मुंबईतील फेरीवाल्यांवर गंभीर आरोप केले. मुंबईतील रेल्वे स्थानकांजवळील ८० टक्के फेरीवाल्यांच्या जागा बांगलादेशी मुस्लिम माफिया आणि मुंब्रा माफियांनी ताब्यात घेतल्याचा दावा त्यांनी केला. या आरोपांवर पत्रकारांनी अधिक माहिती विचारण्याचा प्रयत्न केला असता, सोमैयांनी त्यांना मध्येच थांबवून बोलण्यापासून रोखले. मात्र, काही वेळाने त्यांनी पत्रकार परिषद घेऊन उपस्थित पत्रकारांच्या प्रश्नांना उत्तरे देऊन निर्माण झालेल्या वादावर पडदा टाकला.