Mahayuti : निवडणुका जिंकण्यासाठी मोर्चेबांधणी, महायुतीच्या 54 आमदारांना प्रत्येकी 5 कोटी, कोणत्या पक्षाच्या आमदाराला किती निधी?

महाराष्ट्रामध्ये महायुती सरकारने ५४ आमदारांना त्यांच्या मतदारसंघातील विकास कामांसाठी प्रत्येकी ५ कोटी रुपयांचा निधी मंजूर केला आहे. यामुळे एकूण २७० कोटी रुपयांचा निधी वितरित करण्यात येणार आहे. यामध्ये भारतीय जनता पक्षाच्या ३७, राष्ट्रवादी काँग्रेस (अजित पवार गट) च्या १०, शिंदे शिवसेनेच्या ५ आणि इतर २ आमदारांचा समावेश आहे. विशेष म्हणजे, पहिल्यांदाच निवडून आलेल्या ४७ सत्ताधारी आमदारांनाही हा निधी मिळत आहे. हा निधी स्थानिक स्वराज्य संस्थांच्या आगामी निवडणुका डोळ्यासमोर ठेवून दिला जात असल्याची चर्चा आहे.

विधानसभा निवडणुकांप्रमाणेच स्थानिक स्वराज्य संस्थांच्या निवडणुका जिंकण्यासाठी महायुतीने मोर्चेबांधणी केल्याचे बोलले जात आहे. राज्यामध्ये सरकार स्थापन झाल्यापासून महायुतीच्या आमदारांकडून वाढीव निधीची मागणी केली जात होती. सुरुवातीला १० कोटी रुपयांचा विकास निधी देण्याची योजना होती, परंतु राज्याच्या तिजोरीवरील ताण लक्षात घेऊन ती तात्पुरती बाजूला ठेवण्यात आली होती. या निधी वाटपावर काही जणांनी टीका केली असून, हे कृत्य बेकायदेशीर आणि घटनाबाह्य असल्याचे म्हटले आहे.