Mahayuti Internal Discord : महायुतीतील धुसफूस चव्हाट्यावर, दादा गट अन् शिंदे गटानं भाजपसह मित्रपक्षांनाही दिला इशारा

महाराष्ट्रातील सत्ताधारी महायुतीत स्थानिक निवडणुकांपूर्वीच अंतर्गत संघर्ष उफाळून आला आहे. मित्रपक्षांमध्ये आरोप-प्रत्यारोप आणि जागावाटपावरून तीव्र मतभेद समोर येत आहेत. गडचिरोलीतील राष्ट्रवादी काँग्रेसच्या (अजित पवार गट) दादा गटाचे माजी मंत्री धर्मराव अत्राम यांनी भाजपने त्यांच्या विरोधात ५ कोटी रुपये देऊन पुतण्याला विधानसभा निवडणुकीत उभे केल्याचा गंभीर आरोप केला. १९ जागांवर स्वबळावर लढण्याचा पवित्रा त्यांनी घेतला आहे.

याचबरोबर, कल्याणमध्ये शिंदे गटाच्या जिल्हाप्रमुखांनी भाजपने युती न केल्यास आडवे करून लढण्याचा इशारा दिला आहे. बदलापूरमध्ये भाजप आणि अजित पवार गटानं युती जाहीर करताना शिंदे गटाला बाजूला सारले. जळगावमध्येही अजित पवार गटाचे मंत्री अनिल पाटलांनी महायुती न झाल्यास ताकद दाखवण्याचे संकेत दिले आहेत. महाराष्ट्राच्या विकासासाठी एकत्र आल्याचे सांगणाऱ्या या नेत्यांकडूनच आता एकमेकांना इशारे दिले जात असल्याने राजकीय वर्तुळात चर्चांना उधाण आले आहे.