जरांगेंची उपोषणाच्या तिसऱ्या दिवसशी तब्येत खालावली, डॉक्टर म्हणाले…

मराठा आरक्षणाच्या मागणीसाठी उपोषणाला बसलेले मनोज जरांगे पाटील यांच्या उपोषणाचा आज तिसरा दिवस आहे. जरांगे पाटील यांच्या प्रकृतीवर आता वैद्यकीय पथकाकडून बारकाईने लक्ष ठेवले जात आहे. आज सकाळपासूनच वैद्यकीय पथकाने त्यांची सखोल तपासणी केली. काल रात्रीही वैद्यकीय पथकाने जरांगे पाटील यांची तपासणी केली होती. या तपासणीदरम्यान त्यांच्या शरीरातील साखरेची पातळी (शुगर) आणि रक्तदाब (बीपी) काही प्रमाणात कमी झाल्याचे दिसून आले, ही एक चिंतेची बाब आहे. त्यांच्या प्रकृतीत होणारे हे बदल पाहता, प्रशासनाने वैद्यकीय पथकाला सतर्क राहण्याचे निर्देश दिले आहेत. या गंभीर परिस्थितीत, सरकारकडून एक शिष्टमंडळ आज जरांगे पाटील यांना भेटण्यासाठी येण्याची शक्यता वर्तवली जात आहे.

हे शिष्टमंडळ जरांगे पाटील यांच्याशी चर्चा करून त्यांची समजूत काढण्याचा प्रयत्न करेल, अशी अपेक्षा आहे. मराठा आरक्षणाच्या मागणीसाठी जरांगे पाटील यांनी सुरू केलेले हे उपोषण महाराष्ट्राच्या राजकारणात सध्या महत्त्वाचा विषय बनले आहे. त्यांच्या आरोग्याविषयीची चिंता आणि सरकारी शिष्टमंडळाची संभाव्य भेट यामुळे पुढील घडामोडींकडे सर्वांचे लक्ष लागून राहिले आहे.